ស្រ្តីម្នាក់ជាអនុប្រធានការិយាល័យបោះឆ្នោតមួយក្នុងរាជធានីភ្នំពេញនៅតែត្រូវសមត្ថកិច្ចបន្តឃុំខ្លួនដដែលដោយសារតែគាត់បានលួចផ្ទេរទឹកខ្មៅជ្រលក់ដៃ។
លោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ បានប្រាប់វីអូឌីនៅថ្ងៃនេះថា បច្ចុប្បនសមត្ថកិច្ចកំពុងឃុំខ្លួនស្រ្តីនោះ នៅអធិការខណ្ឌពោធិ៍សែនជ័យ ដើម្បីសាកសួរ និងស្វែងរកអ្នកបញ្ជាពីក្រោយខ្នង រួចបន្តតាមនីតិ វិធី។
កាលពីម្សិលមិញនេះ ស្រ្តីម្នាក់ឈ្មោះ ជា សុធារី ជាអនុប្រធាកការិយាល័យបោះឆ្នោតលេខ១៤០១ នៅសាលាបឋមសិក្សាត្រពាំងក្រសាំង ស្ថិតនៅភូមិត្រពាំងអណ្តូង ត្រូវបានឃាត់ខ្លួនពីបទលួចចាក់ផ្ទេរទឹកថ្នាំជ្រលក់ដៃសម្រាប់បោះឆ្នោតទៅដបតូច កាលពីថ្ងៃទី២៨ ខែកក្កដា ឆ្នាំ២០១៨។
ចំណែកឯករណីយុវជន៤នាក់នៅខេត្តព្រះវិហារដែលបានចាប់ខ្លួនពីបទយកគ្រាប់បែកចូលក្នុងការិយាល័យ លោកគៀត ច័ន្ទថារិទ្ធថាគឺជារឿងយល់ច្រលំដោយសារតែពេលយប់ងងឹត ហើយគ្រាប់បែកដែលគេសង្ស័យនោះគឺជាដែកកេសដែលមានរូបរាងជាគ្រប់បែក។ មកទល់ពេលនេះ យុវជន៤នាក់នោះ ត្រូវបាននគរបាលធ្វើកំណត់ហេតុ និងអប់រំ រួចដោះលែងទៅផ្ទះរៀងខ្លួនវិញ។