គណកម្មាធិការជាតិរៀបចំការបោះឆ្នោតបានឲ្យដឹងថាស្ថាប័ននេះបានទទួលបណ្តឹងជាង២ពាន់បណ្តឹងពីគណបក្សនយោបាយដែលបានចូលរួមប្រកួតក្នុងនោះបណ្តឹងពីគណបក្សសម្ព័ន្ធដើម្បីប្រជាធិបតេយ្យមានច្រើនជាងគេ។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ប្រាប់ VOD នៅថ្ងៃនេះថា គិតត្រឹមម៉ោង១១ និង៣០នាទីថ្ងៃទី៣០ កក្កដា ម្សិលមិញ គ.ជ.ប បានទទួលបណ្តឹងពីគណបក្សនយោបាយទាំងអស់ចំនួន២២០៦បណ្តឹង ក្នុងនោះបណ្តឹងមកពីគណបក្សសម្ព័ន្ធដើម្បីប្រជាធិបតេយ្យមាន២១៧៥ ដែលខ្លឹមសារបណ្តឹងតែមួយប៉ុណ្ណោះគឺមិនទទួលស្គាល់ការគូសសញ្ញាណាក្រៅពីសញ្ញាធិកនៅប្រអប់តូចបួនជ្រុងនោះទេ។
អ្នកនាំពាក្យ គ.ជ.ប លោក ហង្ស ពុទ្ធា
ខណៈដែលលទ្ធផលបណ្តោះអាសន្ននឹងត្រូវប្រកាសនៅថ្ងៃទី១១ សីហាខែក្រោយ លោកហង្ស ពុទ្ធា បានបញ្ជាក់ថាបណ្តឹងទាំងនេះមិនអាចធ្វើឲ្យការប្រកាសលទ្ធផលនេះនឹងត្រូវពន្យារពេលនោះទេ។
ប្រធានគណបក្សសម្ព័ន្ធដើម្បីប្រជាធិបតេយ្យលោក ខឹម វាសនា មានប្រសាសន៍ថាបណ្តឹងរបស់គណបក្សលោកមិនផ្តោតតែលើការគូសសន្លឹកឆ្នោតតែមួយនោះទេ គឺមានបណ្តឹងជាច្រើនទៀតហើយជាពិសេសប្តឹងពីការគំរាមកំហែងរបស់មន្ត្រីគ.ជ.ប ជាមួយអាជ្ញាធរឃុំសង្កាត់មកលើអ្នកសង្កេតការណ៍គណបក្សមួយនេះ។ លោកចាត់ទុកការបញ្ជាក់របស់គ.ជ.បនេះ គឺគ្រាន់តែបង្វែរការចាប់អារម្មណ៍របស់សាធារណជនពីពាក្យបណ្តឹងរបស់ LDP ប៉ុណ្ណោះ។
ប្រធានគណបក្សសម្ព័ន្ធដើម្បីប្រជាធិបតេយ្យលោក ខឹម វាសនា
ចំពោះការករណីបណ្តឹងលើការគូសសន្លឹកឆ្នោតលោក វាសនា បញ្ជាក់ថាមានករណីជាច្រើនដែលកើតមានហើយមិនតិចនោះទេនៅពេលដែលរាប់សន្លឹកឆ្នោតនោះ។
ប្រធានគណបក្សសម្ព័ន្ធដើម្បីប្រជាធិបតេយ្យលោក ខឹម វាសនា
លោកបញ្ជាក់ថាជំហរគណបក្សលោកគឺមិនទទួលសន្លឹកឆ្នោតណាដែលគូសផ្សេងក្រៅពីសញ្ញាធិក ឬប្រហាក់ប្រហែលធិកនោះទេ បើទោះបីជាមានសន្លឹកឆ្នោតមួយចំនួនបានជ្រើសរើសLDP ដោយគូសសញ្ញាផ្សេងពីនេះក៏ដោយ។
គួរបញ្ជាក់ថាក្នុងអំឡុងពេលនៃយុទ្ធនាការឃោសនាបោះឆ្នោតគណបក្សសម្ព័ន្ធដើម្បីប្រជាធិបតេយ្យបានធ្វើការតវ៉ាទៅកាន់ គ.ជ.ប និងរដ្ឋសភាម្តងរួចមកហើយពីការប្រើប្រាស់សញ្ញាក្នុងការបោះឆ្នោតនេះដោយថា ការគូសសញ្ញាណាក៏បានក្នុងប្រអប់ឆ្នោតធំទ្រវែងនោះវានឹងធ្វើឲ្យបាត់បង់ការសំងាត់នៃការបោះឆ្នោត។
បើតាមគម្រោងគ.ជ.ប នឹងប្រកាសលទ្ធផលបណ្តោះអាសន្នអំពីសំឡេងឆ្នោត សន្លឹកឆ្នោតបានការ និងមិនបានការនៅថ្ងៃទី១១ សីហាខាងមុខ ហើយបើសិនជាគ្មានបណ្តឹង លទ្ធផលផ្លូវការពីចំនួនអាសនៈសភាសម្រាប់នីតិកាលថ្មីនឹងប្រកាសថ្ងៃទី១៥សីហាខាងមុខនេះ៕