តុលាការកំពូលនឹងបើកសវនាការ សំណុំរឿងនៅក្រៅឃុំជុំទី២ របស់លោក កឹម សុខាម្តងទៀតនៅថ្ងៃទី២២ ខែសីហា ឆ្នាំ២០១៨ វេលាម៉ោង៨ព្រឹក។ នេះបើយោងតាមមេធាវីម្នាក់ដែលការពារក្តីឲ្យលោក កឹម សុខា។
មេធាវីម្នាក់ដែលការពារក្តីឲ្យលោក កឹម សុខា គឺលោក ចាន់ ចេន បានប្រាប់វីអូឌីថា លោកពុំទាន់បានទទួលលិខិតអញ្ជើញដោយផ្ទាល់ដៃនោះទេ ប៉ុន្តែ លោកបានទទួលព័ត៌មាននេះពីខាងមន្ត្រីតុលាការកំពូលថា នឹងបើកសវនាការ សំណុំរឿងសុំនៅក្រៅឃុំរបស់លោក កឹម សុខា នៅថ្ងៃទី២២ ខែសីហា ខាងមុខនេះ។
គួរបញ្ជាក់ផងដែរ អតីតប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួន កាលពីថ្ងៃទី០៣ ខែកញ្ញា ឆ្នាំ២០១៧ និងបញ្ជូនទៅឃុំខ្លួន នៅពន្ធនាគារត្រពាំងថ្លុង ខេត្តត្បូងឃ្មុំ ក្រោមការចោទប្រកាន់ពីរដ្ឋាភិបាលថា “ក្បត់ជាតិ” ជុំវិញវីដេអូឃ្លីប ដែលលោកថ្លែងនៅអូស្រ្តាលី កាលពីឆ្នាំ២០១៣។