អាជ្ញាធរខ័ណ្ឌឬស្សីកែវ ថាខ្លួនកំពុងរៀបចំបណ្ដឹងប្តឹងមន្ត្រីក្រសួងយុត្តិធម៌មា្នក់ពីបទរារាំងមន្រ្តីរាជការសាធារណៈ។
យោងទៅតាមលោក សន សោភ័ណ្ឌ ប្រធានរដ្ឋបាលខ័ណ្ឌឬស្សីកែវបានអោយដឹងថា អាជ្ញាធរខ័ណ្ឌឬស្សីកែវកំពុងតែរៀបចំឯកសារ ត្រៀមប្តឹងមន្ត្រីជាន់ខ្ពស់ក្រសួងយុត្តិធម៌លោក មាស សាវឿន និង ប្រជាពលរដ្ឋមួយក្រុមពីបទរារាំងមន្រ្តីរាជការសាធារណៈ។ លោកបានបន្តថា ម្ចាស់ដីដែលត្រូវលោក មាស សាវឿនបំពាន ក៏កំពុងតែរៀបចំឯកសារត្រៀមប្តឹងលោកផងដែរ ពីបទរំលោភដីធ្លី។
លោកសោភ័ណ្ឌបានប្រាប់ថា៖« ដីរបស់គេមានប័ណ្ឌរឹង។ គេកំពុងរៀបចំឯកសារប្តឹងហើយ ប្តឹងផ្លូវច្បាប់ហើយ បទល្មើស២ដែលអាចពាក់ព័ន្ធ ទីមួយគឺរារាំងរាជការសាធារណៈ […]ទីពីររំលោភដីគេ ដីគេមានប័ណ្ឌរឹង ដីមានប័ណ្ឌរឹង ឥឡូវកំពុងរៀបចំឯកសារទៅហើយ បើនិយាយឲ្យខ្លីប៉ុណ្ណេះ»
លោក ជា ពិសី អភិបាលខ័ណ្ឌឬស្សីកែវ បាននិយាយលើទំព័រហ្វេសប៊ុកផ្ទាល់ខ្លួនរបស់លោកថា ក្រុមប្រជាពលរដ្ឋដែលតវ៉ាកាលពីម្សិលមិញមិនមែនជាម្ចាស់ដីពិតប្រាកដនោះឡើយ ពោលគឺពួកគាត់គ្រាន់តែជាកម្មករស៊ីឈ្នួលឲ្យលោកមាស សាវឿនតែប៉ុណ្ណោះ។
យោងទៅតាមវីដេអូផ្សាយផ្ទាល់របស់ទំព័រហ្វេសប៊ុកទំព័រ BBN news ប្រជាពលរដ្ឋដែលប៉ះទង្គិចជាមួយអាជ្ញាធរបាននិយាយថា ដីដែលពួកគាត់តវ៉ានោះ ជារបស់លោក មាស សាវឿន ដែលត្រូវបានអាជ្ញារធរឃុបឃិតជាមួយលោកស្រី លឹម វណ្ណា លួចធ្វើឯកសារ រំលោភយក។ ប៉ុន្តែអាជ្ញាធរខណ្ឌឬស្សីកែវ បានបដិសេធនឹងការលើកឡើងនេះ។
វី.អូ.ឌី មិនអាចទាក់ទងសុំការបំភ្លឺពីលោក មាស សាវឿន បានទេនៅថ្ងៃនេះ។
កាលពីរសៀលម្សិលមិញនេះ មានការប៉ះទង្គិចរវាងប្រជាជនដែលមានប្រដាប់ដោយកាំបិត ផ្គាក់ ហ្គាស ជាមួយនឹងអាជ្ញាធរដែលមានគ្រឿងចក្រនិងឡានទឹក ទាក់ទិននឹងជម្លោះដីធ្លីរ៉ាំរ៉ៃមួយកន្លែងនៅសង្កាត់ទួលសង្កែ២ ខ័ណ្ឌឬស្សីកែវ ។ កាលពីខែមករាកន្លងមកអាជ្ញាធរក៏ធ្លាប់បានចុះទៅវាយកម្ទេចរបងថ្មដែលសង់លើដីជម្លោះនេះម្តងរួចមកហើយដែរ។