បុរសម្នាក់ ត្រូវបានបញ្ជូនទៅមន្ទីរពេទ្យភ្លាមៗក្រោយរងគ្រោះដោយសារផ្ទុះគ្រាប់មីននៅខេត្តបន្ទាយមានជ័យ។
ករណីផ្ទុះគ្រាប់មីននេះ កើតឡើងកាលពីម្សិលមិញនេះ នៅត្រង់ចំណុចជើងភ្នំដងរែកស្ថិតនៅភូមិដងរែក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
បុរសរងគ្រោះខាងលើ មានឈ្មោះ អឿន នី ភេទ ប្រុស អាយុ២០ឆ្នាំ រស់នៅភូមិរំដួលចាស់ ឃុំអំពិល ស្រុកបន្ទាយអំពិល ខេត្តឧត្តរមានជ័យ។ ក្នុងហេតុការណ៍អកុសលនេះ បណ្ដាលឲ្យបុរសរងគ្រោះរបួសដាច់ជើងឆ្វេង និងជើងស្ដាំរបួសដាច់រហែកធ្ងន់ធ្ងរ។
របាយការណ៍របស់អាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្រ្គោះជនពិការដោយសារមីនមានករណីផ្ទុះគ្រាប់មីន បង្ហាញថាកាលពីឆ្នាំ២០១៧ មានមនុស្ស៥៨ នាក់ បានរងគ្រោះថ្នាក់ដោយសារមីន៕
