លោក ហ៊ុន សែន សន្យាមិនយកថ្លៃសេវាចំពោះនាវាដឹកជញ្ជូនអ្នកដំណើរសាធារណៈ និងសេវារថភ្លើងភ្នំពេញ-ប៉ោយប៉ែត ប៉ោយប៉ែត-ភ្នំពេញ។
យោងតាមហ្វេសប៊ុកផេករបស់ក្រសួងសាធារណការ និងដឹកជញ្ជូនបានឲ្យដឹងថា នាវាដឹកជញ្ជូនអ្នកដំណើរសាធារណៈព្រែកព្នៅ ភ្នំពេញ-តាខ្មៅ បានសម្ពោធដាក់ឲ្យប្រើប្រាស់ជាផ្លូវការកាលពីម្សិលមិញដោយមានការចូលរួមជាអធិបតីភាពពីលោកហ៊ុន សែន។
ថ្លែងក្នុងពិធីសម្ពោធដាក់ឲ្យប្រើប្រាស់នាវាដឹកជញ្ជូនអ្នកដំណើរសាធារណៈជាផ្លូវការកាលពីម្សិលមិញនេះ លោក ហ៊ុន សែន បានសន្យាថានឹងផ្ដល់ជូននូវសេវាដឹកជញ្ជូនសាធារណៈចំនួន២ដោយឥតគិតថ្លៃ ពោលគឺសេវានាវាដឹកជញ្ជូនអ្នកដំណើរសាធារណៈ និងសេវារថភ្លើងងភ្នំពេញ-ប៉ោយប៉ែត ប៉ោយប៉ែត-ភ្នំពេញ រហូតដល់បំណាច់ឆ្នាំ២០១៨។
បច្ចុប្បន្ននេះនាវាដឹកជញ្ជូនសាធារណៈមានចំនួន៤ ហើយមាន៦ស្ថានីយរួមមាន ព្រែកព្នៅ ឫស្សីកែវ ផ្សារចាស់ ចតុមុខ ច្បារអំពៅ និងតាខ្មៅ។ ការដាក់ដំណើរការឲ្យប្រើប្រាស់ជាបណ្ដោះអាសន្នរបស់នាវាដឹកជញ្ជូនសាធារណៈគិតចាប់ពីថ្ងៃទី០៦ ខែមេសា ឆ្នាំ២០១៨ រហូតដល់ ថ្ងៃទី២៣ ខែកក្កដា ឆ្នាំ២០១៨កន្លងមកនេះ មានអ្នកប្រើប្រាស់សេវាចំនួន ៣០ ៦៤៧នាក់ គិតជាមធ្យម ២០០នាក់ក្នុង១ថ្ងៃ។