ប្រទេសស៊ុយអែតបានចុះហត្ថលេខាផ្តល់ជំនួយគាំទ្រជាង២លានដុល្លារ ដើម្បីបណ្តុះបណ្តាលយុវជនកម្ពុជាលើមុខវិជ្ជាម្ហូបអាហារ និងបដិសណ្ឋារកិច្ច។
យោងតាមទំព័រហ្វេសបុករបស់ស្ថានទូតស៊ុយអែតប្រចាំកម្ពុជាកាលពីម្សិលមិញ ឲ្យដឹងថាទឹកប្រាក់ប្រមាណ២លានដុល្លារនេះនឹងផ្តល់ទៅកាន់វិទ្យាស្ថានម្ហូបអាហារកម្ពុជា សម្រាប់គម្រោងរយៈពេល៣ឆ្នាំ ដើម្បីផ្តល់ឲ្យវិស័យបដិសណ្ឋារកិច្ចនៅកម្ពុជាមាននូវធនធានមនុស្សប្រកបដោយជំនាញ និងការបណ្តុះបណ្តាលត្រឹមត្រូវ តាមរយ:កម្មវិធីសិក្សាស្តង់ដារ និងប្រកបដោយការច្នៃប្រឌិត។
តម្រូវការធនធានមនុស្សដែលមានជំនាញ ផ្នែកចម្អិនម្ហូបអាហារ និងបដិសណ្ឋារកិច្ច កំពុងតែកើនឡើង ខណៈ វិស័យទេសចរណ៍នៅកម្ពុជាកំពុងហក់ឡើងនៅក្នុងឆ្នាំ២០១៧ ហើយការអភិវឌ្ឍថ្មីៗនៅក្នុងវិស័យសណ្ឋាគារ កំពុងតែដំណើរការផងដែរនៅក្នុងឆ្នាំ២០១៨នេះ៕