អង្គភាពប្រឆាំងអំពើពុករលួយ ហៅកាត់ថា (ACU) ប្រកាសថាខ្លួនមិនអាចបើកការស៊ើបអង្កេតប្រធានអង្គការអាដហុកទេ ព្រោះករណីនេះមិនមែនជាអំពើពុករលួយ។
យោងតាមការចុះផ្សាយក្នុងទំព័រហ្វេសប៊ុករបស់អង្គភាពប្រឆាំងអំពើពុករលួយ ឆ្លើយតបទៅអ្នកសារព័ត៌មានកាលពីម្សិលមិញថា ករណីរបស់លោក ធន់ សារាយ មិនមែនជាករណីពុករលួយទេ ព្រោះគាត់មិនបានសូកអ្នកណា ឬទារប្រាក់អ្វីឡើយ។ ប្រភពដដែលលើកឡើងបន្តថា បើលោក ធន់ សារាយ និងភរិយាមិនបានបង់ពន្ធជូនរដ្ឋមែន វាជាបទល្មើសស្ថិតក្នុងសមត្ថកិច្ចអគ្គនាយកដ្ឋានពន្ធដារ។
តាមការចុះផ្សាយរបស់អង្គភាពប្រឆាំងអំពើពុករលួយដដែលនេះ លោក ធន់ សារាយ និងភរិយាពិតជាបានជួលផ្ទះរបស់ខ្លួនឲ្យទៅអង្គការរបស់ខ្លូនមែន ហើយបានបង់ពន្ធកាត់ទុកគ្រប់ចំនួន ដោយយោងតាមប្រព័ន្ធកុំព្យូទ័រថ្ងៃទី ១ ខែមករា ឆ្នាំ២០១៦មក។
កាលពីថ្ងៃទី១៩ ខែមិថុនា ឆ្នាំ២០១៨ អង្គភាពប្រឆាំងអំពើពុករលួយ ហៅកាត់ថា (ACU) បានចេញផ្សាយថា ស្ថាប័ននេះបានទទួលពាក្យបណ្តឹងមួយ ដោយចោទប្រកាន់ប្រធានសមាគមអាដហុក និងភរិយាថា គេចវេសមិនព្រមបង់ពន្ធថ្លៃឈ្នួលផ្ទះជូនរដ្ឋ កាលពីឆ្នាំ២០១៥ និងឆ្នាំ២០១៦៕
