អនុប្រធានអង្គការឃ្លាំមើលសិទ្ធិមនុស្ស (Human Rights Watch) ប្រចាំអាស៊ី ថាពលរដ្ឋកម្ពុជាត្រូវបានគេដាក់សម្ពាធឲ្យចេញទៅបោះឆ្នោត តែ គ.ជ.ប និងមន្រ្តីបក្សកាន់អំណាចបដិសេធការចោទប្រកាន់នេះ។
លោក Phil Robertson មន្ត្រីអង្គការឃ្លាំមើលសិទ្ធិមនុស្ស (Human Rights Watch) បានថ្លែងនៅក្នុងកិច្ចពិភាក្សាវិភាគពីដំណើរការនៃប្រជាធិបតេយ្យនៅកម្ពុជា នាទីក្រុងបាងកកកាលពីម្សិលមិញថា ម្ចាស់ឆ្នោតត្រូវបានគេគំរាមកំហែងក្រោមរូបភាពផ្សេងៗដើម្បីឲ្យពួកចេញទៅបោះឆ្នោត។
លោក Phil Robertson អង្គការឃ្លាំមើលសិទ្ធិមនុស្ស (Human Rights Watch)
លោក Phil Robertson ក៏បានដាក់ការសង្ស័យផងដែរចំពោះចំនួនអ្នកចូលរួមបោះឆ្នោតអាណត្តិនេះ។
លោក Kingsley Abbott ទីប្រឹក្សាច្បាប់ជាន់ខ្ពស់នៃគណៈកម្មការអ្នកច្បាប់អន្តរជាតិ (ICJ) បាននិយាយក្នុងកិច្ចពិភាក្សានោះដែរថាដោយសារតែគណបក្សសង្គ្រោះជាតិ ត្រូវបានគេរំលាយ មានន័យថាគ្រប់ទីកន្លែងទាំងអស់នៅក្រោមអំណាចគណបក្សប្រជាជន ដូចនេះហើយអ្នកដែលធ្វើការថ្នាក់មូលដ្ឋានភាគច្រើន គឺរងសម្ពាធពីការដែលគេត្រូវតែទៅបោះឆ្នោតដោយខានមិនបាន។
អ្នកនាំពាក្យគណៈកម្មាធិការរៀបចំការបោះឆ្នោតលោក ហង្ស ពុទ្ធា បានច្រានចោលនូវបញ្ហាការចោទប្រកាន់ថាប្រជាពលរដ្ឋរងសម្ពាធក្នុងឲ្យទៅបោះឆ្នោត ហើយថាកិច្ចពិភាក្សាដែលរៀបចំកាលពីម្សិលមិញមិនអាចយកជាការបាននោះទេ។
អ្នកនាំពាក្យគណៈកម្មាធិការរៀបចំការបោះឆ្នោតលោក ហង្ស ពុទ្ធា
អ្នកនាំពាក្យគណបក្សប្រជាជន លោក សុខ ឥសាន បានបដិសេធពីការចោទប្រកាន់ថាប្រជាពលរដ្ឋទទួលសម្ពាធឲ្យទៅបោះឆ្នោត ដោយថាការដែលបំផុសប្រជាពលរដ្ឋមិនមែនជាគំនាបនោះទេ។
អ្នកនាំពាក្យគណបក្សប្រជាជន លោក សុខ ឥសាន
យោងតាមរបាយការណ៍របស់គណៈកម្មាធិការរៀបចំការបោះឆ្នោត ប្រជាពលរដ្ឋដែលបានទៅបោះឆ្នោតជ្រើសតាំងតំណាងរាស្ត្រនីតិកាលទី ៦ នេះ មានចំនួន ៦ ៨៨៥ ៧២៩ ស្មើនឹង ៨២,១៧ % នៃចំនួនអ្នកបានចុះឈ្មោះបោះឆ្នោតសរុប ៨ ៣៨០ ២១៧ នាក់៕