ប្រធានសមាគម អាដហុក បានសម្ដែងការព្រួយបារម្ភពីស្ថានការណ៍នយោបាយនៅកម្ពុជាជុំវិញការដាក់ទណ្ឌកម្មពីអន្តរជាតិ ដោយជំរុញឲ្យភាគីរដ្ឋាភិបាល និងអតីតបក្សប្រឆាំងបន្ធូបន្ថយសម្ពាធនយោបាយជៀសវាងការខាតបង់ប្រយោជន៍ជាតិ។
ប្រធានសមាគម អាដហុក លោក ធន សារ៉ាយបានលើកឡើងបែបនេះនៅក្នុងវីដេអូខ្លីបមួយដែលផ្សាយនៅលើទំព័រហ្វេសប៊ុករបស់សមាគម អាដហុក កាលពីម្សិលមិញ ដោយលោកលើកឡើងពីបញ្ហាជុំវិញដំណើរការបោះឆ្នោតជ្រើសតាំងសមាជិកភាកម្ពុជាកាលថ្ងៃទី២៩ ខែកក្កដា ឆ្នាំ២០១៨កន្លងទៅ។
លោក ធន សារ៉ាយ បានលើកឡើងថាក្រោយការបោះឆ្នោតជាតិរួចអាចបញ្ជាក់ឃើញថា ពលរដ្ឋមានភាពចាស់ទុំក្នុងការប្រើសិទ្ធិនយោបាយ ដូចជាការធ្វើពហិការមិនទៅបោះឆ្នោត ការតវ៉ាប្រឆាំងការបោះឆ្នោត នៅតាមប្រទេសនានា ដោយឡែកភាគរយដែលពលរដ្ឋខ្លះបានទៅបោះឆ្នោតនោះ ក៏មិនបង្ហាញពីឆន្ទៈពិត និង បញ្ជាក់ថាជាការបោះឆ្នោតដោយត្រឹមត្រូវ និងយុត្តិធម៌នោះទេ។
លោក ធន សារ៉ាយបានលើកឡើងបន្ថែមថាការបោះឆ្នោតនេះបានធ្វើឲ្យប្រទេសកម្ពុជាក្លាយជាប្រទេសដែលកាន់លទ្ធិប្រធិបតេយ្យចម្លែកខុសគេលើសកលលោក ដោយសារមានតែបក្សកាន់អំណាចមួយក្ដោបអាសនៈទាំងអស់នៅក្នុងរដ្ឋសភា។
លោក ធន សារ៉ាយ បន្ថែមថាមានតែអតីតបក្សសង្គ្រោះជាតិនោះទេ ដែលជាដៃគូប្រគួរប្រជែងពិតប្រាកដរបស់គណបក្សកាន់អំណាច ដែលមានចលនាគាំទ្រច្រើនប្រហាក់ប្រហែលគ្នា ដូច្នេះដើម្បីតម្កល់ប្រយោជន៍ជាតិជាធំ ជៀសផុតពីការដាក់ទណ្ឌកម្មនានា ពីអន្តរជាតិលោកថា មានតែភាគីគណបក្សនយោបាយធំៗទាំង២ គួរកាត់បន្ថយការប្រឈមមុខដាក់គ្នា ដោយដោះស្រាយនយោបាយតាមរយៈការធ្វើឲ្យប្រសើរឡើងនូវលទ្ធិប្រជាធិបតេយ្យ និងសិទ្ធិមនុស្ស ប្រកួតប្រជែងនយោបាយតាមរយៈការបោះឆ្នោតជៀសជាងការប្រើប្រាស់នូវប្រដាប់អាវុធ៕
