ក្រសួងសុខាភិបាល អំពាវនាវឲ្យប្រជាពលរដ្ឋបញ្ឈប់ការប្រើប្រាស់និងជាវឱសថមួយចំនួនដែលត្រូវបានគេបានធ្វើការផ្សព្វផ្សាយនិងលក់នៅក្នុងបណ្ដាញសង្គមហ្វេសប៊ុក ព្រោះគ្មានច្បាប់អនុញ្ញាតត្រឹមត្រូវ។
សេចក្ដីជូនដំណឹងរបស់ក្រសួងសុខាភិបាល ផ្សាយកាលពីថ្ងៃទី០៣ ខែសីហា បានឲ្យដឹងថា បច្ចុប្បន្ននេះនៅលើបណ្ដាញសង្គមហ្វេសប៊ុកមានការផ្សព្វផ្សាយលក់ផលិតផលបំប៉នផ្លូវភេទបុរស ផលិតផលគ្រឿងសម្អាង ឱសថ និងក្រែមលាបបំប៉នផ្លូវភេទជាច្រើន ដែលចរាចរគ្មានការត្រួតពិនិត្យគុណភាព និងគ្មានច្បាប់អនុញ្ញាតពីក្រសួង។
តាមសេចក្តីជូនដំណឹងដដែល ផលិតទាំងនោះមានឈ្មោះដូចជា BalanceX, BalanceO, BalanceC ,BalanceY, BalanceW, BalanceH, និង VIMAX។ ក្រសួងសុខាភិបាល ក៏បានអំពាវនាវឲ្យប្រជាពលរដ្ឋបញ្ឈប់ការប្រើប្រាស់ជាបន្ទាប់ចំពោះប្រភេទថ្នាំខាងលើ ដើម្បីជៀសវាងការខាតប្រាក់កាស និងប៉ះពាល់ដល់សុខភាព ឬឈានដល់ការបាត់បង់អាយុជីវិតដោយសារការគាំងបេះដូងផងដែរ។
អ្នកនាំពាក្យក្រសួងសុខាភិបាល លោក លី សូវ៉ាន់ បានប្រាប់ វី.អូ.ឌី ឲ្យដឹងថានៅថ្ងៃនេះថា ក្រសួងនឹងចាត់វិធានការតាមផ្លូវច្បាប់ចំពោះបុគ្គលដែលលក់ថ្នាំមិនបានចុះបញ្ជី ប្រសិនបើដឹងពីទីតាំងរបស់បុគ្គលទាំងនោះ។ លោកក៏បានសំណូមពរថា បើប្រជាពលរដ្ឋដឹងពីទីតាំងចែកចាយអ្នកលក់ផលិតទាំងនោះ ប្រាប់មកក្រសួងផង។
កាលពីខែសីហាឆ្នាំ២០១៧ កម្លាំងនគបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បានឃាត់ខ្លួនស្រ្ដីលក់ឡេអនឡាញម្នាក់ ព្រោះគ្មានការអនុញ្ញាតគុណភាពពីក្រសួងសុខាភិបាល និងក្រសួងពាណិជ្ជកម្ម ៕
