សហភាពសហជីពកម្ពុជា បានស្នើឲ្យបក្សកាន់អំណាចនិងអតីតបក្សប្រឆាំងជួបជជែកគ្នាដោះស្រាយបញ្ហានយោបាយ ដោយបារម្ភខ្លាចសហគមន៍អន្តរជាតិប្រតិកម្មជាអវិជ្ជមានទៅនឹងការបោះឆ្នោតកាលពីថ្ងៃទី២៩ខែកក្កដាកន្លងទៅ ហើយអាចបណ្ដាលឲ្យកម្មករនិយោជិតគ្មានការងារធ្វើ។
សេចក្តីថ្លែងការណ៍របស់សហភាពសហជីពកម្ពុជា ដែលចេញនៅថ្ងៃនេះ បានសំណូមពរឲ្យរដ្ឋាភិបាលកម្ពុជាទទួលយករាល់អនុសាសន៍របស់សហគមន៍អន្តរជាតិ ហើយថ្នាក់ដឹកនាំគណបក្សកាន់អំណាច និងអតីតគណបក្សសង្គ្រោះជាតិ ត្រូវអង្គុយនិយាយគ្នា រកដំណោះស្រាយនយោបាយ ដើម្បីរក្សាការងារសម្រាប់កម្មករនិយោជិត និងស្ថិរភាពសង្គម។
សេចក្តីថ្លែងការណ៍ដដែល ក៏បានគាំទ្រចំពោះការសម្រេចចិត្ត និងអនុសាសន៍របស់សហគមន៍អន្តរជាតិដែលចង់ឃើញរាជរដ្ឋាភិបាលកម្ពុជាដោះលែងលោក កឹម សុខា ប្រធានគណបក្សសង្គ្រោះជាតិ ផ្តល់ភាពស្របច្បាប់ដល់គណបក្សសង្គ្រោះជាតិ ដោះលែងអ្នកទោសមនសិការ សកម្មជនដីធ្លី អ្នកសារព័ត៌មាន អង្គការសង្គមស៊ីវិល មានសេរីភាពពេញលេញឡើងវិញ និងសារព័ត៌មានឯករាជ្យដំណើរការឡើងវិញជាដើម។
សហគមន៍អន្តរជាតិនានារួមមានសហរដ្ឋអាមេរិក បណ្ដាប្រទេសនៅសហគមអឺរ៉ុប កាណាដា អូស្រ្តាលី និងណូវេហ្សេឡង់ជាដើម ហៅការបោះឆ្នោតកាលពីថ្ងៃទី២៩កក្កដា ថាមិនមានភាពសេរីនិងយុត្តិ។ ប៉ុន្តែសម្រាប់ប្រទេសសង្គមនិយមមួយចំនួនមានដូចជាចិន ឡាវ និង វៀតណាមជាដើមបានអបអរកម្ពុជាដែលរៀបចំការបោះឆ្នោតមួយដែលប្រកបដោយជោគជ័យ៕
