ថ្មីៗនេះមានគណនីហ្វេសប៊ុកមួយចំនួនបានបង្កើតនូវល្បែងមួយប្រភេទដែលគេហៅថា Facebook Giveaway ដោយតម្រូវអោយញអ្នកលេងល្បែងនោះត្រូវ Like Comment និង Share ដើម្បីឈ្នះរង្វាន់ដោយការជ្រើសរើសពីម្ចាស់គណនីជាដើម។
ល្បែងប្រភេទនេះត្រូវបានអ្នកជំនាញបច្ចេកវិទ្យាបាននិយាយថា វាគ្រាន់តែជាការបោកប្រាស់តែប៉ុណ្ណោះ ដោយគេនឹងលួចយកទិន្នន័យរបស់អ្នកប្រើប្រាស់តាមរយៈការ Like Comment និង Share ឬនៅពេលដែលអ្នកប្រើប្រាស់ចូលទៅកាន់ តំណភ្ជាប់ ឬ Link ណាមួយនៅលើបណ្តាញសង្គមនោះ។
គេហទំព័រទស្សនាវដ្តីបច្ចេកវិទ្យាអនឡាញមួយដែលមានឈ្មោះថា How-to Geek តែងតែចុះផ្សាយអត្ថបទសរសេរពន្យល់ ពីបញ្ហាសុវត្ថិភាពនៃការប្រើប្រាស់ប្រព័ន្ធអ៊ីធើណេត ហើយអត្ថបទដែលសរសេរដោយលោក Harry Guinness ចុះផ្សាយកាលពីថ្ងៃទីខែ១៣ ខែកុម្ពះ អោយដឹងថា ល្បែងប្រកួតប្រជែងតាមបណ្តាញសង្គមហ្វេសប៊ុកនោះ គ្រាន់តែបង្កើតឡើងដើម្បីបន្លំយកពត៌មានផ្ទាល់ខ្លួនរបស់អ្នកប្រើប្រាស់ប៉ុណ្ណោះ។
គេហទំព័រដដែលបានអោយដឹងថា តំរុយដែលអោយដឹងថាតើល្បែងប្រកួតប្រជែងនោះបោកប្រាស់គឺ រង្វាន់ដែលគេនឹងផ្តល់អោយវាមានតំលៃពេកដែលមិនអាចនឹងក្លាយជាការពិត ម៉ាករបស់អាស័យដ្ឋានឬគេហទំព័រ គ្មានការប្រកាសតាមគេហទំព័រផ្លូវការ អ្នកប្រើប្រាស់តម្រូវអោយចែករំលែកទៅដល់មិត្តភក្តិ និងមានអ្នកចូលរួមប្រកួតប្រជែងច្រើនតែគ្មានការបញ្ជាក់ពីរង្វាន់ដែលផ្តល់អោយអ្នកឈ្នះជាដើម។
កាលពីប៉ុន្មានសប្តាហ៍មុនមានគណនីហ្វេសប៊ុកមួយដែលគេជឿថាជាគណនីផ្ទាល់របស់តារាសំដែងហូលីវូដ លោក Dwayne ‘The Rock’ Johnson បានបង្ហោះវីដេអូនិងរូបភាពទឹកប្រាក់ជាដុល្លារ ដោយនិយាយថា «ចែករំលែក ដើម្បីទទួលបានលុយនេះ» ហើយគណនីនោះក៏បាន comment ថានឹងមានឪកាសឈ្នះទឹកប្រាក់និងរថយន្ត ដោយគេនឹងជ្រើសរើសអ្នកដែលទាញយកវីដេអូខ្សែភាពយន្តមាន តំណភ្ជាប់នៅក្នុងសារនោះ។
បើយោងទៅតាមគេហទំព័រ Scopes ដែលជាវេបសាយពិនិត្យមើលការពិតពីពាក្យចចាមអារាមផ្សេងៗលើប្រព័ន្ធអ៊ីនធើណេតបានអោយដឹងថា លោក The Rock’ នឹងមិនអោយជាទឹកប្រាក់ រថយន្ត ឬអ្វីឡើយលើបណ្តាញសង្គម។ តំណភា្ជប់ដែលគេដាក់អោយទាញយកខ្សែភាពយន្តដើម្បីមានឪកាសឈ្នះនោះគ្រាន់តែជានុយមួយសំរាប់ការបន្លំតែប៉ុណ្ណោះ ហើយតំណភ្ជាប់នោះនឹងលួចយកនូវព័ត៌មានផ្ទាល់ខ្លួន និង លេខគណនីកាតឥណទានរបស់អ្នកដែលបានចុចចូល។
ចំណែកឯគេហទំព័រ Hoax-Slayer ដែលគ្រប់គ្រងផ្ទាល់ដោយលោក Brett Christensen តែងតែផ្តល់នៅព័ត៌មានដែលទាក់ទងនឹងការបោកបញ្ឆោតតាមប្រព័ន្ធអ៊ីធើណេតនោះបានអោយដឹងថា ល្បែងប្រកួតប្រជែងនោះមានទាក់ទងនឹងលោក Dwayne ‘The Rock’ Johnson នោះឡើយ ដោយគណនីផ្លូវការរបស់លោក ក៏មិនបានបង្ហោះសារអ្វីទាក់ទងនឹងបញ្ហានេះដែរ។
ប្រភពដដែលបានបន្តថា៖
តាមរបាយការណ៍របស់គណៈកម្មការពាណិជ្ជកម្មសហព័ន្ធ ដែលអតិថិជនបានកត់ត្រានូវបទពិសោធន៍បញ្ហាពូកគេជួបប្រទះហើយចង់ជូនជាដំណឹងទៅអ្នកឯទៀត ហើយកំណត់ត្រានោះបានអោយដឹងថា មនុស្សក្នុងវ័យចន្លោះ ២០ ទៅ ២៩ ឆ្នាំជាជនរងគ្រោះក្នុងករណីបោកប្រាស់ជាលុយកាក់ច្រើនជាងមនុស្សវ័យចំណាស់អាយុលើសពី៧០ឆ្នាំ។
លោក ប៉ា ច័ន្ធរឿន ប្រធានមជ្ឈមណ្ឌលទស្សនៈវិជ្ជា អនុវត្តន៍ និងសីលធម៌កម្ពុជា បានប្រាប់វីអូឌីថា បណ្តាញសង្គមជាសង្គមពិតនៃឌីជីថល ការ Like Share និង Comment ដែលជាល្បែងប្រកួតប្រជែងលើបណ្តាញសង្គមនេះ ធ្វើឡើងក្នុងគោលបំណងបុគ្គល អ្នកខ្លះលក់ផលិតផល អ្នកខ្លះទៀតធ្វើឡើងដើម្បីទាក់ទាញការ ចូលចិត្តអោយបានច្រើនពីអ្នកប្រើប្រាស់ ហ្វេសប៊ុកតែប៉ុណ្ណោះ ។
លោក ប៉ា ច័ន្ធរឿន ប្រធានមជ្ឈមណ្ឌលទស្សនៈវិជ្ជា អនុវត្តន៍ និងសីលធម៌កម្ពុជា
លោកបាននិយាយទៀតថា អ្នកប្រើប្រាស់បណ្តាញសង្គមគួរតោងយកឥរិយាបទមួយចំនួន អំពីការប្រើប្រាស់ប្រព័ន្ធហ្នឹងអោយច្បាស់លាស់ ជាពិសេសទាក់ទងនឹងសុវត្ថិភាព ឯកជនភាព និងទាំងការគោរពខ្លួនឯងទាំងការគោរពអ្នកដទៃ។