ក្រសួងប្រៃសណីយ៍និងទូរគមនាគន៍ សហការជាមួយស្ថានទូតឥណ្ឌាប្រចាំកម្ពុជា ជ្រើសរើសយកស្រុកមួយនៅក្នុងខេត្តតាកែវ បង្កើតជាកន្លែងដែលពលរដ្ឋអាចប្រើប្រាស់ប្រព័ន្ធអ៊ីនធឺណេតបានដើម្បីទទួលព័ត៌មានជុំវិញវិស័យកសិកម្ម។
អ្នកនាំពាក្យនិយ័តករទូរគមនាគមន៍នៃក្រសួងប្រៃសណីយ៍ លោក អ៊ឹម វត្ថា បានប្រាប់វី.អូ.ឌីនៅថ្ងៃនេះថា គម្រោងនោះឈ្មោះ “ភូមិឌីជីថល” រៀបចំនៅក្នុងស្រុកទ្រាំង ដែលរៀបចំឲ្យមានប្រព័ន្ធអ៊ីនធឺណេត មានហេដ្ឋារចនាសម្ព័ន្ធ ទូរគមនាគមន៍ និងបច្ចេកវិទ្យាធ្វើយ៉ាងណាឲ្យពលរដ្ឋអាចទទួលបានព័ត៌មានពាក់ព័ន្ធវិស័យកសិកម្ម។
អ្នកនាំពាក្យនិយ័តករទូរគមនាគមន៍នៃក្រសួងប្រៃសណីយ៍ លោក អ៊ឹម វត្ថា
ស្រុកទ្រាំង ខេត្តតាកែវត្រូវបានឥណ្ឌាជ្រើសរើសជា តំបន់សាកល្បងដែលគេហៅថា ផាយឡុតប្រូជេក ( Pilot Project ) ពីព្រោះខេត្តតាកែវគឺជាខេត្តមួយដែលមានសក្ដានុពលកសិកម្មធំ។
លោក អឹុម វត្ថា បានបន្ដថា ទោះបីជាយ៉ាងណាគម្រោងមួយនេះនៅពំុទាន់មានពេលវេលា និងចំណាយទុនជាក់លាក់ប៉ុន្មាននោះទេ ពីព្រោះគេត្រូវធ្វើការសាកល្បងសិន ប្រសិនបើគម្រោងនេះជោគជ័យគេនឹងបន្ដវិសាលភាពទៅកាន់បណ្ដាស្រុក ឬខេត្តផ្សេងទៀត។
អគ្គលេខាធិការសម្ព័ន្ធសហគមន៍កសិករកម្ពុជាលោក ថេង សាវឿន មានប្រសាសន៍ថា បើគម្រោងនេះដំណើរការល្អមានសារៈសំខាន់សម្រាប់កសិករ ដោយលោកថា កសិករបច្ចុប្បន្ន កំពុងខ្វះព័ត៌មាន។
អគ្គលេខាធិការសម្ព័ន្ធសហគមន៍កសិករកម្ពុជាលោក ថេង សាវឿន
ប្រទេសកម្ពុជា មិនមែនជាប្រទេសដំបូងដែលឥណ្ឌាធ្វើគម្រោងភូមិឌីជីថលទេ។ ឥណ្ឌាធា្លប់បានសហការជាមួយបណ្ដាប្រទេសនានានៅក្នុងអាស៊ានដូចជា ឡាវ វៀតណាម និងប្រទេសនៅឥណ្ឌូចិនផ្សេងទៀតផងដែរ។