លទ្ធផលបណ្តោះអាសន្ននៃការបោះឆ្នោតជ្រើសតាំងតំណាងរាស្ត្រនីតិកាលទី៦ ដែលចេញដោយ គ.ជ. ប បង្ហាញថាគណបក្សប្រជាជនរបស់លោកនាយករដ្ឋមន្រ្តីហ៊ុន សែន ទទួលបានសំឡេងច្រើនជាងគេនៅគ្រប់រាជធានី-ខេត្តទាំងអស់។
តាមតារាងប្រកាសលទ្ធផលបណ្តោះអាសន្ននៃការបោះឆ្នោតដែលបានប្រកាសនៅព្រឹកនេះ គណៈម្មាធិការរៀបចំការបោះឆ្នោត ឲ្យដឹងថា គណបក្សដែលទទួលបានសំឡេងច្រើនជាងគេមាន គណបក្សប្រជាជនកម្ពុជាដែលទទួលបាន ៤,៨៨៩,១១៣សំឡេងទូទាំងប្រទេស។ ឯគណបក្សដែលបានសំលេងលំដាប់ទី២ និងទី៣ គឺ គណបក្សហ៊្វុនស៊ីនប៉ិចទទួលបាន ៣៧៤,៥១០សំឡេង និងគណបក្សសម្ព័ន្ធដើម្បីប្រជាធិបតេយ្យបាន ៣០៩,៣៦៤សំឡេង។
ចំណែកគណបក្សដែលទទួលបានសំឡេងតិចជាងគេគឺគណបក្សរស្មីខេមរា ដែលទទួលបានតែ ៤២១២ សំឡេង ប៉ុណ្ណោះនៅទូទាំងប្រទេស។
គ.ជ.ប ក៏បានចេញសេចក្តីសម្រេចមួយនៅថ្ងៃនេះដែរ ដោយឲ្យគណបក្សដែលបានឈរឈ្មោះបោះឆ្នោត អាចប្តឹងពីលទ្ធផលបណ្តោះអាសន្ននេះក្នុងរយៈពេល៧២ម៉ោង។
គ.ជ.ប បញ្ជាក់ឲ្យដឹងថា ចំនួនអ្នកទៅបោះឆ្នោតអាណត្តិនេះមានជាង៨៣ភាគរយ ដោយក្នុងបញ្ជីបោះឆ្នោតមានចំនួន ៨,៣៨០,២១៧នាក់ ហើយអ្នកដែលទៅបោះឆ្នោតមានចំនួន ៦,៩៥៦,៩០០នាក់៕
