ជនជាតិចិនចំនួន៧នាក់ត្រូវ បានអាជ្ញាធរខេត្តព្រះសីហនុបញ្ជូនទៅសាលាដំបូងខេត្តទាក់ទងនឹងការជួញដូរផ្លូវភេទ។
នគរបាលខេត្តព្រះសីហនុកាលពីថ្ងៃទី១២ ខែសីហា កន្លងទៅ បានបង្រ្កាបហាងម៉ាស្សាមួយកន្លែង ចាប់ជនជាតិចិនចំនួន២៩នាក់ ដោយចោទថាពួកគេពាក់ព័ន្ធនឹងការប្រព្រឹត្តបទល្មើសជួញដូរផ្លូវភេទ។
ប្រធានការរិយាល័យព្រហ្មទណ្ឌកំរិតស្រាលលោក សុទ្ធ សំអុន បានប្រាប់ វី.អូ.ឌី តាមទូរស័ព្ទថាជនជាតិចិនចំនួន ៧នាក់ត្រូវបានបញ្ចូនទៅកាន់សាលាដំបូងក្រោយពីការស៊ើបអង្កេតរួច។លោកបន្តថា ជនជាតិចិនទំាង៧នាក់នោះរួមមាន ថៅកែហាង អ្នកគិតបញ្ជី អ្នកយាម អ្នកបើកឡានជូនភ្ញៀវ អ្នកទិញឥវ៉ាន់ និងអ្នកចែកខិតប័ណ្ឌ ចំនួន២នាក់ ហើយជនជាតិចិន២២នាក់ផ្សេងទៀតត្រូវធ្វើកិច្ចសន្យា និងអប់រំឲ្យត្រលប់ទៅវិញ។
មន្ដ្រីសម្របសម្រួលអង្គការអាដហុក អ្នកស្រី ជាប សុធារី លើកឡើងថាប្រជាពលរដ្ឋរស់នៅក្រុងព្រះ សីហនុពិតជាមានការព្រួយបារម្ភខ្លាំងនៅពេលមានហាងម៉ាស្សាបែបនេះ។
មន្ដ្រីសម្របសម្រួលអង្គការអាដហុក អ្នកស្រី ជាប សុធារី
អ្នកស្រីបានសំណូមពរឲ្យសមត្ថកិច្ចខេត្តព្រះសីហនូគួរតែត្រួតពិនិត្យគ្រប់ទីតាំងទាំងអស់ដែលជនជាតិចិនបើកអាជីវកម្ម និងចុះណែនាំជនជាតិចិនចំណូលថ្មីទាំងនោះឲ្យបានដឹងអំពីច្បាប់នៅក្នុងប្រទេសកម្ពុជាផងដែរ។
កាលពីយប់ថ្ងៃទី១២ សីហា ក៏មានករណីឃាត់ខ្លួនបុរសជនជាតិចិនចំនួន ៦នាក់ ដោយអាជ្ញាធរខេត្តព្រះសីហនុផងដែរ ដោយសារតែពួកគេចែកខិត្តប័ណ្ណដែលគេសង្ស័យថាផ្សព្វផ្សាយពីការជួញដូរផ្លូវភេទនៅក្នុងហាងម៉ាស្សាមួយ។ ប៉ុន្ដែក្រោយពីមានការបកប្រែខិតប័ណ្ឌនោះរកឃើញថាគ្មានកំហុស ជនជាតិចិនទំាង៦នាក់នោះ គ្រាន់តែធ្វើការអប់រំ និងធ្វើកិច្ចសន្យាបញ្ឍប់សកម្មភាពផ្សព្វផ្សាយនេះ ៕
