ស្ថានទូតសាធារណរដ្ឋប្រជាមានិតចិនប្រចាំនៅកម្ពុជា បានចុះចែកអំណោយដល់ប្រជាពលរដ្ឋចំនូន ១៥០០គ្រួសារ ដែលរងគ្រោះដោយសារទឺកជំនន់ នៅខេត្តកំពង់ចាម កាលពីម្សិលមិញនេះ។
ទំព័រហ្វេសប៊ុកផ្លូវការរបស់ស្ថានទូតចិន បានឲ្យដឹង លោក សុង បូ ឯកអគ្គរដ្ឋទូតសាធារណរដ្ឋប្រជាមានិតចិន បាននាំអំណោយក្នុងនោះរួមមានអង្ករ មីកញ្ចប់ ភេសជ្ជៈ ត្រីខកំប៉ុង ជាដើម ដែលមានតម្លៃជាទឹកប្រាក់ ៣០ម៉ឺនយ័ន ឬប្រមាណជាជាង៤ម៉ឺនដុល្លា យកទៅចែកជូនដល់ក្រុមគ្រួសាររងគ្រោះដោយសារទឹកជំនន់ចំនួន១៥០០គ្រួសារនៅស្រុកកោះសូទិន ខេត្តកំពង់ចាម។ សកម្មភាពនេះក៏មានការចូលរួមពី សហព័ន្ធយុវជនកម្ពុជារបស់ លោក ហ៊ុន ម៉ានី ផងដែរ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្ដរាយ លោក កែវ វី បានប្រាប់វីអូឌីនៅថ្ងៃនេះថា ខេត្តចំនួន៦ រួមមាន ខេត្តត្បូងឃ្មុំ កំពង់ចាម ក្រចេះ ស្ទឹងត្រែង កណ្តាល និងព្រៃវែង បានទទួលរងគ្រោះដោយទឹកជំនន់ ប៉ះពាល់ដល់ពលរដ្ឋ៨២៩៦៤គ្រួសារ ហើយបណ្ដាលឲ្យមនុស្សស្លាប់ចំនួន១៨នាក់ និងរបួស៦នាក់។
ប្រភពខាងលើបានបន្ថែមឲ្យដឹងដែរថា មានការខូចខាតផ្ទះចំនួន២៨ខ្នងដោយសារបាក់ច្រាំងទន្លេ និងសាលារៀនចំនួន២១២ កន្លែង វត្តអារាមចំនួន១០៥កន្លែង និងមណ្ឌលសុខភាពចំនួន១៨កន្លែងរងការលិច ហើយដំណាំស្រូវលិចទឹកមាន ចំនួន៣៧៨១០ហិចតា ក្នុងនោះខូចចំនួន ៧០៧២ ហិចតា និងដំណាំរួមផ្សំនិងដំណាំចំការដែលលិចទឹកមានចំនួន ៦៦៤៣ហិចតា ក្នុងនោះខូចចំនួន ២០៣៩ ហិចតាផងដែរ៕