គណបក្សសម្ព័ន្ធដើម្បីប្រជាធិបតេយ្យបញ្ជាក់ថាខ្លួននឹងមិនចូលរួមវេទិកាពិគ្រោះយោបល់ជាមួយនាយករដ្ឋមន្ត្រីនោះទេ ខណៈបក្សមួយចំនួនទៀតថាខ្លួនកំពុងពិចារណា។
ប្រធានគណបក្សសម្ព័ន្ធដើម្បីប្រជាធិបតេយ្យលោក ខឹម វាសនា បានបញ្ជាក់ប្រាប់VOD ថាគណបក្សលោកនឹងមិនចូលរួមក្នុងវេទិកាពិគ្រោះយោបល់រវាងរដ្ឋាភិបាល និងគណបក្សនយោបាយទាំង២០ ដែលនឹងប្រារព្ធនៅថ្ងៃទី ២១ សីហាខាងមុខនោះទេ ដោយថាគ្មានប្រយោជន៍ និងគ្រាន់តែជារូបភាពបិទបាំងរឿងអាក្រក់របស់រដ្ឋាភិបាលប៉ុណ្ណោះ។
ប្រធានគណបក្សសម្ព័ន្ធដើម្បីប្រជាធិបតេយ្យលោក ខឹម វាសនា
មិនខុសពីលោកខឹម វាសនា ប្រធានបក្សប្រជាធិបតេយ្យមូលដ្ឋានលោក យ៉េង វីរៈ មានប្រសាសន៍ថា វេទិកានេះមិនអាចដោះស្រាយបញ្ហាដែលកម្ពុជាជួបប្រទះនោះទេ តែលោកថាគណបក្សលោកនឹងពិចារណាថាទៅចូលរួម ឬមិនចូលរួម។
ប្រធានបក្សប្រជាធិបតេយ្យមូលដ្ឋានលោក យ៉េង វីរៈ
អគ្គលេខាធិការគណបក្សខ្មែរឈប់ក្រលោក ស៊ិន វណ្ណារិទ្ធ ថាគណបក្សលោកមិនទាន់អាចឆ្លើយតបបាននៅឡើយទេចំពោះការចូលរួមនោះ ដោយរង់ចាំការសម្រេចជាមួយប្រធានបក្សជាមុនសិន តែលោកយល់ថាវេទិកាជំនួបរវាងនាយករដ្ឋមន្ត្រី និងគណបក្សនយោបាយនោះគឺគ្រាន់តែរូបភាពមួយដែលធ្វើឲ្យបក្សប្រកួតប្រជែងការបោះឆ្នោតស្ងប់ចិត្តប៉ុណ្ណោះ។
ប្រធានគណបក្សរស្មីខេមរាលោក ស៊ិន សុភាព ដែលជាបក្សមួយមិនទទួលស្គាល់លទ្ធផលឆ្នោតអាណត្តិនេះពុំទាន់អាចបញ្ជាក់បានទេថានឹងចូលរួមឬយ៉ាងណាដោយថានៅរង់ចាំការសម្រេចពីគណៈអចិន្ត្រៃយ៍បក្សជាមុនសិន បើទោះបីលោកយល់ថាការការចូលរួមពិភាក្សានេះ ហាក់បង្ហាញថាចាញ់ប្រៀបលោកហ៊ុន សែន ក៏ដោយក្តី។
ប្រធានគណបក្សរស្មីខេមរាលោក ស៊ិន សុភាព
កាលពីថ្ងៃទី១៥ សីហា លោកនាយករដ្ឋមន្ត្រីហ៊ុន សែន បានប្រកាសថា នឹងបង្កើតឲ្យមានវេទិកាពិគ្រោះយោបល់ ជាមួយគណបក្សដែលបានចូលរួមប្រកួតការបោះឆ្នោតមុនបង្កើតរដ្ឋាភិបាលថ្មី ដើម្បីប្រមូលគំនិតជំរុញដល់ការអភិវឌ្ឍបែបប្រជាធិបតេយ្យ សេរី ពហុបក្ស។
អ្នកវិភាគនយោបាយលោក បណ្ឌិត មាស នី គាំទ្រការបង្កើតវប្បធម៌សន្ទនា ប៉ុន្តែថាអ្វីដែលបានលេចចេញពេលនេះ ជាយុទ្ធសាស្ត្រចាស់ ដែលអ្នកនយោបាយធ្លាប់ធ្វើ ដើម្បីទាក់ទាញការគាំទ្រពីសហគមន៍ជាតិ និងអន្តរជាតិ ។
អ្នកវិភាគនយោបាយរូបនេះ យល់ថា ល្បែងនយោបាយចាស់ យកមកសម្តែងថ្មីទៀតនេះ ទំនងជា មានការពិបាកទាក់ទាញឲ្យសហគមន៍អន្តរជាតិជឿ បើធៀបទៅនឹងការសម្តែងកាលពីអតីតកាល។
អ្នកវិភាគនយោបាយលោក បណ្ឌិត មាស នី
លទ្ធផលនៃការបោះឆ្នោតជ្រើសតាំងតំណាងរាស្ត្រអាណត្តិទី៦ បានឲ្យដឹងថាគណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែន បានកាន់កាប់អាសនៈទាំងអស់១២៥នៃរដ្ឋសភា ធ្វើឲ្យសភាអាណត្តិទី៦គ្មានសំឡេងបក្សប្រឆាំងនោះទេ៕