គណបក្សមួយចំនួននៅក្នុងចំណោមគណបក្សនយោបាយ ១៩ ដែលបានចូលរួមក្នុងការបោះឆ្នោតប្រកួតប្រជែងទល់នឹងគណបក្សកាន់អំណាចនោះ បានឲ្យដឹងថា ពួកគេនឹងចូលរួមក្នុងវេទិកាមួយ ដែលនឹងរៀបចំឡើងដោយលោកនាយករដ្ឋមន្ត្រី ហ៊ុន សែន នៅថ្ងៃស្អែកនេះ។
លោក ហ៊ុន សែន បានប្រកាសកាលពីថ្ងៃទី១៥សីហាថា លោកនឹងរៀបចំវេទិកាពិគ្រោះយោបល់ជាមួយគណបក្សនយោបាយ ដែលមិនទទួលបានអាសនៈនៅក្នុងរដ្ឋសភា នៅមុនបង្កើតរដ្ឋាភិបាលថ្មី ដើម្បីប្រមូលគំនិតជំរុញដល់ការអភិវឌ្ឍតាមបែបប្រជាធិបតេយ្យសេរីពហុបក្ស។
ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ បានប្រាប់វីអូឌីថា លោកនឹងចូលរួមនៅក្នុងវេទិកាមួយនេះ ដោយលោកថា ដើម្បីចូលរួមផ្ដល់ទស្សនៈរបស់បក្សលោក និងដើម្បីកុំឲ្យគណបក្សប្រជាជនកម្ពុជា ធ្វើអ្វីស្រេចតែចិត្តនៅក្នុងរដ្ឋសភា។
ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ
ដូចទៅនឹងលោក សូណង់ដូ ផងដែរ ប្រធានគណបក្សឆន្ទៈខ្មែរ លោក គង់ មុនីកា បានប្រាប់ថា លោកក៏នឹងចូលរួមក្នុងវេទិកាពិគ្រោះយោបល់នោះផងដែរ ហើយលោកចាត់ទុកវេទិកានេះថា នឹងបណ្តុះនូវគំនិតថា បើទោះជាបក្សនីមួយៗមាននិន្នាការផ្សេងគ្នា ក៏អាចជជែកគ្នាបានដែរ។
ប្រធានគណបក្សឆន្ទៈខ្មែរ លោក គង់ មុនីកា
ប្រធានគណបក្សសញ្ជាតិកម្ពុជា លោក សេង សុខេង បានប្រាប់ថា លោកក៏នឹងទៅចូលរួមការជួបប្រជុំនៅថ្ងៃស្អែកនេះផងដែរ ដោយថា ចង់ចូលរួមក្នុងការអភិវឌ្ឍរបស់ប្រទេស ហើយចង់ធ្វើការពិភាក្សាពីចន្លោះប្រហោងគោលនយោបាយរបស់រដ្ឋាភិបាល។
ប្រធានគណបក្សសញ្ជាតិកម្ពុជា លោក សេង សុខេង
ប្រធានគណបក្សខ្មែរអភិវឌ្ឍន៍សេដ្ឋកិច្ច លោក ហួន រាជចំរើន បានឲ្យដឹងថា បើទោះបីជាគណបក្សលោកប្រកាសមិនទទួលស្គាល់ការបោះឆ្នោតអាណត្តិទី៦នេះក៏ដោយ ប៉ុន្តែ លោកថា លោកនឹងចូលរួមក្នុងជំនួបនេះផងដែរ ព្រោះលោកយល់ស្របនឹងការបង្កើតឲ្យមានវេទិកាជំនួបរវាងរាជរដ្ឋាភិបាល និងគណបក្ស ១៩ផ្សេងទៀត។
ប្រធានគណបក្សខ្មែរអភិវឌ្ឍន៍សេដ្ឋកិច្ច លោក ហួន រាជចំរើន
ចំណែកគណបក្សខ្មែរឈប់ក្រវិញ នៅថ្ងៃនេះបានដាក់លិខិតបដិសេធ មិនចូលរួមក្នុងវេទិកានៅថ្ងៃស្អែកនេះទេ ដោយលើកឡើងថា វេទិកានេះ នៅតែមិនទាន់មានសិទ្ធិសេរីភាពក្នុងការបញ្ចេញមតិនៅឡើយ។
អគ្គលេខាធិការគណបក្សខ្មែរឈប់ក្រ លោក ស៊ិន វណ្ណារិទ្ធ បានប្រាប់វីអូឌីថា ការប្រជុំនេះជាវេទិកាមួយល្អ ក៏ប៉ុន្តែ បើទោះជាចូលរួម គឺបានត្រឹមតែស្តាប់នូវយុទ្ធសាស្ត្រនានារបស់គណបក្សកាន់អំណាចតែប៉ុណ្ណោះ។
អគ្គលេខាធិការគណបក្សខ្មែរឈប់ក្រ លោក ស៊ិន វណ្ណារិទ្ធ
មិនមែនមានតែគណបក្សខ្មែរឈប់ក្រទេ ដែលបដិសេធចូលរួមវេទិកានោះ គណបក្សសម្ព័ន្ធដើម្បីប្រជាធិបតេយ្យ ដែលដឹកនាំដោយលោក ខឹម វាសនា ក៏នឹងមិនចូលរួមក្នុងវេទិកាពិគ្រោះយោបល់នៅថ្ងៃស្អែកនេះដែរ។
កាលពីថ្ងៃទី១៧ ខែសីហា លោក ខឹម វាសនា បានប្រាប់វីអូឌីថា វេទិកានោះ គ្មានប្រយោជន៍ និងគ្រាន់តែជារូបភាពបិទបាំងរឿងអាក្រក់របស់រដ្ឋាភិបាលតែប៉ុណ្ណោះ។
លទ្ធផលនៃការបោះឆ្នោតជ្រើសតាំងតំណាងរាស្ត្រអាណត្តិទី៦ បានឲ្យដឹងថា គណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែន បានកាន់កាប់អាសនៈទាំងអស់ ១២៥នៃរដ្ឋសភា ធ្វើឲ្យសភាអាណត្តិទី៦ គ្មានសំឡេងបក្សប្រឆាំងនោះទេ៕
