អតីតអ្នកសាព័ត៌មានវិទ្យុអាស៊ីសេរីពីរនាក់ដែលទើបតែត្រូវបានដោះលែងឲ្យនៅក្រៅឃុំកាលពីម្សិលមិញ កំពុងប្រឈមមុខបញ្ហាមួយចំនួនដូចជា បាត់បង់ផ្ទះដែលខ្លួនទិញបង់រំលោះនិងកំពុងជួបបញ្ហាប្រឈមរឿងជីវភាព ប៉ះពាល់បញ្ហាផ្លូវកាយ ផ្លូវចិត្តផ្ទាល់ខ្លួននិងក្រុមគ្រួសារ។
ថ្លែងប្រាប់VODតាមទូរសព្ទនៅព្រឹកនេះ លោក យាង សុធារិន្ទ ឲ្យដឹងថា លោកទទួលនូវការខូចខាតពីការឃុំខ្លួន ដោយថាបាត់បង់ទាំងផ្ទះ ប៉ះពាល់ដល់ទាំងក្រុមគ្រួសារលោកទាំងមូល។
អតីតបុគ្គលិកវិទ្យុអាស៊ីសេរី លោក យាង សុធារិន្ទ
លោក សុធារិន្ទ បន្តថាលោកសំណូមពរឲ្យតុលាការពិចារណាទម្លាក់ចោលនូវការចោទប្រកាន់នេះ ដោយថា ដើម្បីអាចមានសេរីភាពអាចប្រកបមុខរបរចិញ្ចឹមគ្រួសារ និងអាចបានទៅថែទាំឪពុកម្តាយនៅកម្ពុជាក្រោមផង។
ចំណែក លោក អ៊ួន ឈិន ក៏បានស្នើដូចគ្នាដែរ ដោយថា នេះជាឧបសគ្គដល់ជីវភាពរបស់លោកដែលធ្វើឲ្យលោកមិនអាចធ្វើអ្វីបានឡើយនៅពេលនេះ។
អតីតបុគ្គលិកវិទ្យុអាស៊ីសេរី លោក អ៊ួន ឈិន
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មានប្រសាសន៍ខ្លីថា នេះជារឿងផ្ទាល់ខ្លួនរបស់លោកទាំងពីរ និងបិទទូរសព្ទភ្លាម ហើយមិនលើកទូរសព្ទVODបន្តទៀតទេ បើទោះជាមានការព្យាយាមសុំការឆ្លើយតបជាច្រើនដងក៏ដោយ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ
ការដោះលែងអតីតអ្នកសារព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ បានធ្វើឡើងតែមួយថ្ងៃក្រោយព្រះមហាក្សត្រសម្រេចលើកលែងទោស អ្នកស្រី ទេព វន្នី និងសកម្មជនដីធ្លី៣រូបផ្សេងទៀត និងធ្វើឡើងមិនដល់មួយសប្តាហ៍នៃការដោះលែង លោក គឹម សុខ អ្នកវិភាគបញ្ហានយោបាយ និងសង្គម។
លោក អួន ឈិន និងលោក យាង សុធារិន្ទ ត្រូវបានសមត្ថកិច្ចចាប់ខ្លួនកាលពីល្ងាចថ្ងៃទី១៤ ខែវិច្ឆិកា ឆ្នាំ២០១៧ ហើយត្រូវបានតុលាការចោទប្រកាន់ថា បានលួចផលិតព័ត៌មានពីប្រទេសកម្ពុជាទៅឲ្យបរទេស ដែលធ្វើឲ្យប៉ះពាល់ដល់សន្តិសុខជាតិ៕
