ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃលោក ស ខេង ប្រកាសហាមមន្ត្រីពន្លត់អគ្គីភ័យទាំងអស់ដាក់លក្ខខណ្ឌដល់ជនរងគ្រោះ ដោយបញ្ជាមន្ត្រីទាំងនោះត្រូវធ្វើការតាមវិជ្ជាជីវៈឲ្យបានត្រឹមត្រូវ ខណៈមន្ត្រីដែលមានស្នាដៃល្អក្រសួងនឹងពិចារណាលើកទឹកចិត្តជូន។
ក្នុងពិធីប្រគល់រថយន្តពន្លត់អគ្គីភ័យចំនួន៨៧គ្រឿង ជូនស្នងការនគរបាលខេត្ត ក្រុង ដើម្បីអន្តរាគមន៍ ទប់ស្កាត់បង្ការ ពន្លត់អគ្គីភ័យ នៅព្រឹកនេះលោក ស ខេង មានប្រសាសន៍ថា មន្ត្រីអគ្គីភ័យជាមន្ត្រីរបស់រដ្ឋបម្រើប្រជាជនដោយហាមដាច់ខាតមិនត្រូវយកតួនាទី និងភារកិច្ចរបស់ខ្លួនយកទៅដាក់លក្ខខណ្ឌ ឬទាមទារសាគុណពីពលរដ្ឋនោះទេ។
រដ្ឋមន្ត្រីក្រសួងមហាផ្ទៃលោក ស ខេង
ប្រធាននាយកដ្ឋានបង្ការ និងពន្លត់អគ្គីភ័យ នៃអគ្គស្នងការដ្ឋាននគរបាលជាតិ លោកឧត្តមសេនីយ៍ទោ នេត វន្ថា បានប្រាប់VOD ថារហូតមកដល់ពេលនេះមិនមានបណ្ដឹងពីពលរដ្ឋ ករណីមន្ត្រីអគ្គីភ័យធ្វើខុសវិជ្ជាជីវៈនោះទេ ប៉ុន្តែមានការផ្សព្វផ្សាយតាមបណ្តាញសង្គមមួយចំនួនពីករណីនេះ។ ទោះជាយ៉ាងណាលោកជំរុញពលរដ្ឋឲ្យដាក់ពាក្យប្តឹងផ្លូវការមកនាយកដ្ឋាន ដើម្បីឲ្យនាយកដ្ឋានមានវិធានការតាមផ្លូវច្បាប់លើមន្ត្រីទាំងនោះ។
ប្រធាននាយកដ្ឋានបង្ការ និងពន្លត់អគ្គីភ័យ នៃអគ្គស្នងការដ្ឋាននគរបាលជាតិ លោកឧត្តមសេនីយ៍ទោ នេត វន្ថា
នាយកប្រតិបត្តិសម្ព័ន្ធគណនេយ្យភាពសង្គមលោក សន ជ័យ មានប្រសាសន៍ថាករណីដែលមន្ត្រីអគ្គីភ័យដាក់លក្ខខណ្ឌពីពលរដ្ឋនេះនៅតែមានការលើកឡើងពីពលរដ្ឋនៅឡើយ ហើយលោកយល់ថាការថ្លែងរបស់លោកស ខេង នៅពេលនេះគឺគ្រាន់តែជាការរំលឹកប៉ុណ្ណោះ។
នាយកប្រតិបត្តិសម្ព័ន្ធគណនេយ្យភាពសង្គមលោក សន ជ័យ
ច្បាប់ស្តីពីការបង្ការ និងពន្លត់អគ្គីភ័យមាត្រា២៧ ចែងថា មន្ត្រីអគ្គីភ័យដែលខ្វះការទទួលខុសត្រូវ មិនបំពេញភារកិច្ចឬបំពេញភារកិច្ចដោយមិនត្រឹមត្រូវក្នុងការពន្លត់អគ្គីភ័យ បង្ករឲ្យខូចខាតទ្រព្យសម្បត្តិដែលជាកម្មសិទ្ធិរបស់អ្នកដទៃត្រូវផ្តន្ទាទោសដាក់ពន្ធនាគារពី៦ខែដល់២ឆ្នាំ និងពិន័យជាប្រាក់ពី១លាន ដល់៤លានរៀល។
របាយការណ៍ក្រសួងមហាផ្ទៃបានឲ្យដឹងថាក្នុងឆ្នាំ២០១៧ អគ្គីភ័យបានកើតឡើងចំនួន៥១៤លើកនៅទូទាំងប្រទេស ដោយបានសម្លាប់មនុស្ស២២នាក់ និងបណ្តាលឲ្យរបួសមនុស្ស១២៨នាក់៕