ក្រុមអ្នកធ្វើយុទ្ធនាការម្រាមដៃស្អាតកាលពីអំឡុងពេលបោះឆ្នោតកន្លងទៅ បានអះអាងថាពួកគាត់នឹងលក់ទ្រព្យរបស់ដើម្បីបង់ប្រាក់ពិន័យទោះបីជាពួកគាត់គិតថាការសម្រេចដែលធ្វើឡើងដោយគណៈកម្មាធិការជាតិរៀបចំការបោះឆ្នោតនិងក្រុមប្រឹក្សាធម្មនុញ្ញមិនយុត្តិធម៌ក៏ដោយ។
លោក គ្រុយ គឹមសាំង ដែលត្រូវពិន័យចំនួន៥លានរៀលដោយសារតែលោកធ្វើយុទ្ធនាការម្រាមដៃស្អាត បានប្រាប់វី.អូ.ឌីថា ការពិន័យនេះគឺពិតជាអយុត្តិធម៌សំរាប់លោក ប៉ុន្តែការបង់ប្រាក់ពិន័យ បើសិនជាច្បាប់តំរូវគឺលោកត្រូវតែបង់។ លោកបានបន្តថា បច្ចុប្បន្ននេះលោកមិនសូវមានលទ្ធភាពប៉ុន្មានទេ ដូច្នេះលោកត្រូវតែលក់សម្ភារៈប្រើប្រាស់ដើម្បីបានប្រាក់បង់ពិន័យ។
លោក គ្រុយ គឹមសាំង
អតីតប្រធានគណបក្សសង្រ្គោះជាតិខេត្តបាត់ដំបងដែលត្រូវគ.ជ.ប ពិន័យជាប្រាក់១០លានរៀលដោយសារតែធ្វើយុទ្ធនាការដូចគ្នានេះ លើកឡើងថាលោកនឹងអតីតសហការីលោក២រូបទៀតនោះមិនមានលទ្ធភាពក្នុងការបង់នូវប្រាក់ពិន័យទាំងអស់នោះទេ។ លោក បានអំពាវនាវដល់ប្រជាពលរដ្ឋទាំងក្នុងនិងក្រៅប្រទេសឲ្យ ជួយឧបត្ថម្ភជាថវិកាដើម្បីឲ្យពួកលោកមានលទ្ធភាពក្នុងការបង់ប្រាក់ពិន័យទាំងនោះ។
អតីតប្រធានគណបក្សសង្រ្គោះជាតិខេត្តបាត់ដំបង លោក ជា ជីវ
លោក ជា ជីវ បារម្ភថាបើសិនជាលោកមិនទៅបង់ការពិន័យនោះលោកនឹងសហការីរបស់លោក២នាក់ទៀតនឹងត្រូវប្រឈមនឹងវិធានការផ្លូវច្បាប់ផ្សេងទៀតដែលធ្វើអោយលោកបាត់បង់សិទ្ធិសេរីភាព។
អតីតប្រធានគណបក្សសង្រ្គោះជាតិខេត្តបាត់ដំបង លោក ជា ជីវ
មិនខុសពីលោក ជា ជីវ និង លោកគ្រុយ គឹមសាំងនោះទេ លោក ថោង សារឿន ក៏យល់ថាសេចក្តីសម្រេចនេះក៏ជាភាពអយុត្តិធម៌សំរាប់លោកដែរ ហើយលោកថាលោកមិនថវិកាគ្រប់គ្រាន់សំរាប់បង់ពិន័យនោះទេ។
លោក ថោង សារឿន
លោក ថោង សារឿន បានអំពាវនាវអោយរដ្ឋាភិបាលសូមអោយដោះលែងតែម្តងពីការពិន័យនេះដោយសារតែលោកគ្រាន់តែជាប្រជាពលរដ្ឋនៅទេមិនមែនជាមន្ត្រីរាជការឬមន្ត្រីរបស់បក្សណាឡើយ។
ក្រុមប្រឹក្សាធម្មនុញ្ញកាលពីថ្ងៃទី១៥ សីហាបានតម្ដល់សេចក្ដីសម្រេចរបស់គណៈកម្មការជាតិរៀបចំការបោះឆ្នោតគ.ជ.បកាលពីថ្ងៃទី៩ខែសីហាទាក់ទងនឹងសំណុំរឿងយុទ្ធនាការម្រាមដៃស្អាតទុកជាបាន ហើយសេចក្ដីសម្រេចនេះ ជាសេចក្ដីសម្រេចស្ថាពរបិទផ្លូវការតវ៉ា ។ កាលពីថ្ងៃទី៩ខែសីហា គ.ជ.ប បានសម្រេចពិន័យអតីតអ្នកគាំទ្រគណបក្សសង្រ្គោះជាតិ៣នាក់ដែលក្នុងនោះមានលោកជា ជីវ ត្រូវពិន័យប្រាក់១០លានរៀលលោកគ្រុយ គឹមសាំង និង លោកថោង សារឿន ត្រូវបង់ពិន័យ៥លានរៀលក្នុងម្នាក់៕
