អាជ្ញាធរកម្ពុជា បានចាប់ខ្លួនជនជាតិឥណ្ឌា ១២នាក់ កាលពីថ្ងៃម្សិលមិញនេះ នៅរាជធានីភ្នំ ដោយរកឃើញថា បានស្នាក់នៅ និងធ្វើការដោយខុសច្បាប់នៅកម្ពុជា។
គេហទំព័រនគរបាលជាតិ បានចេញផ្សាយកាលពីថ្ងៃម្សិលមិញថា នគរបាលប៉ុស្តិ៍រដ្ឋបាលផ្សារថ្មី២ ខណ្ឌដូនពេញ បានចុះត្រួតពិនិត្យ និងបានរកឃើញជនជាតិឥណ្ឌា ១៤នាក់ បានស្នាក់នៅ និងធ្វើការដោយខុសច្បាប់នៅកម្ពុជា។
បើតាមគេហទំព័រនគរបាលជាតិ អាជ្ញាធរកម្ពុជា បានរកឃើញថា ជនជាតិឥណ្ឌា ២នាក់ មានលិខិតឆ្លងដែន និងប័ណ្ណការងារ ខណៈជនជាតិឥណ្ឌា ១២នាក់ទៀត មានលិខិតឆ្លងដែន ប៉ុន្តែ ពុំមានប័ណ្ណការងារនោះឡើយ។
ប្រធាននាយកដ្ឋានស៊ើបអង្កេត និងអនុវត្តនីតិវិធី នៃក្រសួងមហាផ្ទៃ លោក អ៊ុក ហៃសីឡា បានប្រាប់វីអូឌីតាមបណ្ដាញសង្គមនៅថ្ងៃនេះថា ជនបរទេសដែលត្រូវបានអាជ្ញាធរកម្ពុជាបណ្ដេញចេញពីកម្ពុជាក្នុងរយៈពេល៨ខែដើមឆ្នាំ២០១៨នេះ មានចំនួនសរុប ៧៧២នាក់ ក្នុងចំណោមជនបរទេស ៤៣សញ្ជាតិ ដោយភាគច្រើនជាជនជាតិចិនដល់ទៅ ៣៥២នាក់៕