អនុប្រធានគណបក្សសំបុកឃ្មុំសង្គមប្រជាធិបតេយ្យបានដាក់ពាក្យស្នើរសុំលាលែងពីដំណែង ដោយលើកហេតុផលថាបក្សនេះមិនបានគោរពប្រជាធិបតេយ្យផ្ទៃក្នុង។
យោងតាមលិខិតលាលែង របស់លោក ហ៊ាង គឹមស្រឿន ដែលចេញកាលពីថ្ងៃទី២៣ ខែសីហានេះ លោក ហ៊ាង គឹមស្រឿន បានដាក់ពាក្យស្នើរសុំលាលែងពីសមាជិកភាព អនុប្រធានគណបក្សសំបុកឃ្មុំសង្គមប្រជាធិបតេយ្យ និងជាអនុប្រធានគណកម្មាធិការអចិន្ដ្រៃយ៍គណបក្សសំបុកឃ្មុំសង្គមប្រជាធិបតេយ្យ។
ក្នុងលិខិតដដែល លោក ហ៊ាង គឹមស្រឿន ដោយបានមើលឃើញពីគោលជំហររបស់គណបក្សសំបុកឃ្មុំ និងមិនបានគោរពប្រជាធិបតេយ្យផ្ទៃក្នុងបក្សក្នុងការសម្រេចចិត្តចូលរួមបង្កើត ឧត្តមក្រុមប្រឹក្សាពិគ្រោះ និងផ្ដល់យោបល់ ដោយអត្តនោម័ត។
ក្រោយកិច្ចប្រជុំជាមួយលោកនាយករដ្ឋមន្ដ្រីហ៊ុន សែន នៅវិមានសន្ដិភាព កាលពីថ្ងៃទី២១ ខែសីហា លោក ម៉ម សូណង់ដូ បានមានប្រសាសន៍ថា លោកគាំទ្រឲ្យរដ្ឋាភិបាលបង្កើត «ឧត្តមក្រុមប្រឹក្សាពិគ្រោះ និងផ្តល់យោបល់»នេះឲ្យបានឆាប់ដើម្បីងាយស្រួលឲ្យតំណាងគណបក្សនយោបាយដែលចាញ់ឆ្នោត មានឱកាសជួយប្រជាពលរដ្ឋ និងសង្គមជាតិ៕