ក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជា អំពាវនាវដល់គ្រឹះស្ថានធនាគារនិងមីក្រូហិរញ្ញវត្ថុឲ្យមានការយោគយល់ចំពោះអតិថិជនដែលរងគ្រោះដោយទឹកជំនន់។
យោងតាមសេចក្ដីថ្លែងការណ៍រួមរវាងក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជា ចេញផ្សាយថ្ងៃនេះ បានថ្លែងអំពាវនាវនិងលើកទឹកចិត្តចំពោះគ្រឹះស្ថានធនាគារនិងមីក្រូហិរញ្ញវត្ថុឲ្យមានការយោគយល់ និងដោះស្រាយទន់ភ្លន់ចំពោះអតិថិជនដែលរងផលប៉ះពាល់ពីគ្រោះទឹកជំនន់។
សេចក្ដីថ្លែងការណ៍ដដែលក៏អំពាវនាវឲ្យគ្រឹះស្ថានមីក្រូហិរញ្ញវត្ថុធ្វើការពិនិត្យ និងវាយតម្លៃលទ្ធភាពសងរបស់ប្រជាកសិករ ដែលរងគ្រោះផង ជាពិសេសបន្ធូរបន្ថយរយៈពេលសង បន្ថយអត្រាការប្រាក់ ឬមិនយកការប្រាក់ក្នុងរយៈពេលណាមួយ មិនត្រូវរឹបអូសទ្រព្យសម្បត្តិរបស់ប្រជាកសិករឡើយ និងផ្ដល់ការគាំទ្រចាំបាច់ស្របតាមកាលៈទេសៈជាក់ស្ដែងផងដែរ។
សមាគមមីក្រូហិរញ្ញវត្ថុកម្ពុជានៅថ្ងៃនេះ ក៏បានចេញសេចក្តីថ្លែងការណ៍អំពាវនាវដូចគ្នាដល់គ្រឹះស្ថានមីក្រូហិរញ្ញវត្ថុនិងគ្រឹះស្ថានជាសមាជិក របស់ខ្លួនចូលរួមសម្រួលដល់ប្រជាពលរដ្ឋដែលរងគ្រោះដោយទឹកជំនន់។
លោកនាយករដ្ឋមន្រ្តីហ៊ុន សែន កាលពីម្សិលមិញបានអំពាវនាវឲ្យក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជា រកដំណោះស្រាយជួយបន្ធូរបន្ថយអត្រាការប្រាក់ និងពន្យាពេលសង ចំពោះប្រជាពលរដ្ឋរងគ្រោះដោយទឹកជំនន់ ដែលបានខ្ចីប្រាក់ពីគ្រឹះស្ថានហិរញ្ញវត្ថុទាំងឡាយ៕
