ព្រះមហាក្សត្របានត្រាស់បង្គាប់លើកលែងទោសដល់អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន។
តាមព្រះរាជក្រឹត្យឡាយព្រះហស្តលេខាដោយព្រះមហាត្សត្រនៅថ្ងៃនេះ បានបង្គាប់ឲ្យលើកលែងទោសលោក អ៊ុំ សំអាន។
មេធាវីការពារក្តីឲ្យលោក អ៊ុំ សំអាន គឺលោក សំ សុគង់ ឲ្យដឹងថា តុលាការកំពុងតែពិនិត្យនីតិវិធី ឲ្យហើយអាចនឹងដោះលែងកូនក្តីរបស់លោកនៅល្ងាចនេះ។
កាលពីថ្ងៃទី១០ ខែតុលា ឆ្នាំ២០១៦ សាលាដំបូងរាជធានីភ្នំពេញ បានសម្រេចផ្តន្ទាទោស លោក អ៊ុំ សំអាន ដាក់ពន្ធនាគារ២ឆ្នាំ៦ខែ និងពិន័យជាប្រាក់៤លានរៀល ដោយចោទពីបទបទញុះញង់ឲ្យប្រព្រឹត្តបទឧក្រិដ្ឋជាអាទិ៍ បង្កភាពវឹកវរធ្ងន់ធ្ងរដល់សន្តិសុខ សង្គម និងញុះញង់ឲ្យមានការរើសអើង ក្រោយពីអតីតតំណាងរាស្ត្ររូបនេះ និយាយថា ការបោះបង្គោលព្រំដែន តាមសន្ធិសញ្ញាបំពេញបន្ថែម ឆ្នាំ២០០៥ ធ្វើឲ្យកម្ពុជាបាត់ដីខ្លះទៀតទៅវៀតណាម។
សំណុំរឿងលោក អ៊ុំ សំអាន បន្តប្តឹងដល់តុលាការកំពូល ហើយតុលាការជាន់ខ្ពស់មួយនេះ ចេញសេចក្តីសម្រេចកាលពីថ្ងៃទី០៩ ខែកុម្ភះ ឆ្នាំ២០១៨ ដោយរក្សាទុកបទចោទដូចតុលាការថ្នាក់ក្រោម។