របាយការណ៍សមត្ថកិច្ចឲ្យដឹងថា រយៈពេល៦ខែដើមឆ្នាំនេះ អ្នកប្រើប្រាស់គ្រឿងញៀនដែលកំពុងស្នាក់នៅតាមមូលដ្ឋាននិងកំពុងស្នាក់នៅក្នុងមណ្ឌលអប់រំស្តារនីតិសម្បទា មានចំនួនជិត២ម៉ឺននាក់។ នេះបើតាមអគ្គស្នងការនគរបាលជាតិ។
គេហទំព័រអគ្គស្នងការដ្ឋាននគរបាលជាតិកាលពីម្សិលមិញ បានឲ្យដឹងពីសន្និបាតបូកសរុបលទ្ធផលកិច្ចប្រតិបត្តការប្រឆាំងបទល្មើសគ្រឿងញៀនឆមាសទី១និងលើកទិសដៅឆមាសទី២ឆ្នាំ២០១៨ថា តាមការជំរឿនស្ថិតិអ្នកប្រើប្រាស់គ្រឿងញៀនដែលស្នាក់នៅតាមមូលដ្ឋាននិងកំពុងនៅក្នុងមជ្ឈមណ្ឌលអប់រំស្តារនីតិសម្បទា មានសរុប ១៨,៥៥៩នាក់(ស្រី៣០១នាក់)។
គេហទំព័របន្តថា ទន្ទឹមនឹងសភាពការណ៍បទល្មើសគ្រឿងញៀនតាមតំបន់ពុំមានការថយចុះ កម្ពុជានៅតែបន្តទទួលរងនូវឥទ្ធិពលពីការផលិត និងការចរាចរគ្រឿងញៀនឆ្លងកាត់ ដែលបានធ្វើឲ្យមានផលប៉ះពាល់រងគ្រោះដោយសារការប្រើប្រាស់រាលដាលទៅដល់ជនបទ។
គេហទំព័រដដែលបញ្ជាក់ថា ក្នុងឆមាសទី១ ឆ្នាំ២០១៨នេះ សមត្ថកិច្ចមន្ទីរប្រឆាំងគ្រឿងញៀនរឹបអូសរុក្ខជាតិញៀនខាត(KHAT)ទម្ងន់៣២២៧គីឡូក្រាមដែលនាំពីប្រទេសអេព្យូពីចូលមកកម្ពុជា និងបង្ក្រាបករណីជួញដូរធំ២ករណី ចាប់ពី១០គីឡូក្រាមឡើង រឹបអូសបានគ្រឿងញៀនជាង៤៨គីឡូក្រាម។
កម្ពុជាបានដាក់ចេញផែនការជាតិ៣ឆ្នាំ(២០១៦-២០១៨) ស្តីពីការត្រួតពិនិត្យគ្រឿងញៀន និងការចូលរួមអនុវត្តន៍គោលនយោបាយភូមិឃុំមានសុវតិ្ថភាព និងផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៣(០១មករា ដល់ ៣១ ខែធ្នូ ឆ្នាំ២០១៨)។
