សាលាឧទ្ធរណ៍របស់កូរ៉េខាងត្បូងសម្រេចផ្តន្ទាទោសលោក ប៉ាក ឃឿនហេឲ្យជាប់ពន្ធនាគារចំនួន២៥ឆ្នាំ ដោយចោទថា ជាប់ពាក់ព័ន្ធអំពើពុករលួយ។
សវនាការកាលពីថ្ងៃសុក្រម្សិលមិញ ចៅក្រមបានលើកឡើងពីករណីប្រព្រឹត្តអំពើពុករលួយ ក្នុងនោះរួមទាំងការទទួលសំណូកពីក្រុមហ៊ុន Samsung ជាក្រុមធំរបស់កូរ៉េខាងត្បូងផងដែរ។
កាលពីខែមេសាសាលាដំបូងបានសម្រេចផ្តន្ទាទោសលោក ស្រី ប៉ាក ឃឿនហេ ឲ្យជាប់ពន្ធនាគារចំនួន២៤ឆ្នាំ និងពិន័យជាប្រាក់១៦លានដុល្លារ។ ប៉ុន្តែសាលាឧទ្ធរណ៍បានបន្ថែមចំនួនទោសជាប់ឃុំ និងប្រាក់ពិន័យគឺត្រូវឃុំខ្លួនដល់២៥ឆ្នាំ និងពិន័យជាប្រាក់ដល់១៨លានដុល្លារ។នេះបើតាមសារចុះផ្សាយរបស់New York Time។
លោកស្រី ប៉ាក ឃឿនហេ វ័យ៦៦ឆ្នាំ ជាប់ឆ្នោតជាប្រធានាធិបតីកាលពីឆ្នាំ២០១៣ ហើយត្រូវបានសភាបោះឆ្នោតដកតំណែងកាលពីចុងឆ្នាំ២០១៦។ ការចោទប្រកាន់ដោយសារតែមិត្តភ័ក្តិជាស្ត្រីស្និទ្ធម្នាក់ បានយកឈ្មោះលោកស្រីទៅប្រើដើម្បីប្រមូលប្រាក់ពីក្រុមហ៊ុនផ្សេងៗក្រោមរូបភាពមូលនិធិសប្បុរសធម៌។ លោកស្រី ប៉ាក ឃឿនហេ តែងតែបកស្រាយថា គាត់មិនជាប់ពាក់ព័ន្ធករណីនេះទេ។
ទោះយ៉ាងណាសវនាការនេះ នៅមិនទាន់បញ្ចប់ទេ គឺលោកស្រី នឹងប្តឹងបន្តទៅកាន់តុលាការកំពូលទៀត ដើម្បីប្រឆាំងសេចក្តីសម្រេចរបស់តុលាការពីរថ្នាក់ នៅខាងក្រោម។