សមត្ថកិច្ចខេត្តព្រះសីហនុ បានប្រាប់វីអូឌីឲ្យដឹងថា ខ្លួនបានបញ្ជូនជនជាតិចិនចំនួន១៥នាក់ទៅកាន់សាលាដំបូងខេត្តនេះពីបទជួញដូរនិងប្រើប្រាស់គ្រឿងញៀន ក្រោយឆ្មក់ចូលក្លឹបកំសាន្តមួយក្នុងខេត្តនេះ។
ប្រធានការិយាល័យប្រឆាំងនឹងគ្រឿងញៀនក្រុងព្រះសីហនុលោក ស៊ុយ សុផាត បានលើកឡើងថា ក្រុមការងាររបស់លោកបានរកឃើញថាក្នុងចំណោមអ្នកដែលត្រូវបានឃាត់ខ្លួនចំនួន៦២នាក់កាលពីថ្ងៃទី២៦ ខែសីហា មានអ្នកប្រើប្រាស់គ្រឿងញៀនចំនួន១២នាក់ និង អ្នកចែកចាញចំនួន៣នាក់ ។ ចំណែក៤៧នាក់ទៀតដែលគ្រាន់តែជាភ្ញៀវ ត្រូវបានធ្វើការអប់រំនិងដោះលែងឲ្យត្រលប់ទៅ វិញ។
កាលពីថ្ងៃរំលងអាធ្រាតទី២៦ ខែសីហា ឆ្នាំ២០១៨កន្លងទៅនេះ សមត្ថកិច្ចខេត្តព្រះសីហនុ បានឆ្មក់ចូលក្លឹបកំសាន្តមួយឈ្មោះស៊ីតុងហ្វាង ហើយបានឃាត់មនុស្ស៦២នាក់ទៅធ្វើការសាកសួរដោយសង្ស័យពីបទប្រើប្រាស់និងចែកចាយគ្រឿងញៀន៕
