ពលរដ្ឋចំនួន ២៦នាក់ បានបញ្ជូនមកកម្ពុជាវិញ បន្ទាប់ពីមានការជួយធ្វើអន្តរាគមន៍ពីស្ថានតំណាងកម្ពុជានៅប្រទេសមួយចំនួន ក្រោយពីពួកគេចាញ់បោកមេខ្យល់ទៅរៀបការ និងធ្វើការដោយខុសច្បាប់នៅប្រទេសទាំងនោះ ។
សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិដែលចេញផ្សាយថ្ងៃនេះ បានឲ្យដឹង ស្ថានតំណាងកម្ពុជានៅក្រៅប្រទេស បានធ្វើអន្តរាគមន៍ជួយពលរដ្ឋខ្មែរចំនួន២៦នាក់នៅប្រទេសបីផ្សេងគ្នា។
ប្រភពដដែលឲ្យដឹងថាស្រ្តីដែលត្រូវបានមេខ្យល់បោកបញ្ឆោតយកទៅរៀបការនិងស្នាក់នៅដោយខុសច្បាប់ជាមួយបុរសជនជាតិចិននៅប្រទេសចិនមានចំនួន១៧នាក់។ ពលករ-ពលការិនីខ្មែរ ដែលបានទៅធ្វើការដោយខុសច្បាប់នៅប្រទេសម៉ាឡេស៊ីចំនួន ៧នាក់ និងពលករដែលធ្វើការលើទូកនេសាទហើយត្រូវអាជ្ញាធរឥណ្ឌូនេស៊ីឃាត់ខ្លួនមានចំនួន ២នាក់៕