គណបក្សប្រជាធិបតេយ្យមូលដ្ឋាន(GDP)បញ្ជាក់ថា បក្សនេះស្វាគមន៍ការចូលរួមរបស់លោក សួន សេរីរដ្ឋា អតីតប្រធានគណបក្សអំណាចខ្មែរ។
ក្រោយចេញពីពន្ធនាគារលោក សួន សេរីរដ្ឋា ថ្លែងប្រាប់សារព័ត៌មានថ្មីៗថា លោកមានបំណងចង់ចូលរួមនយោបាយជាមួយគណបក្សប្រជាធិបតេយ្យមូលដ្ឋាន។
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន មានប្រសាសន៍ថា បក្សរបស់លោកមិនទាន់ទទួលបានដំណឹង ឬការស្នើសុំចូលរួមពីលោក សួន សេរីរដ្ឋានៅឡើយទេ។
ទោះយ៉ាងណាលោកថា គោលការណ៍គណបក្សនេះ ស្វាគមន៍រាល់ការចូលរួមរបស់ប្រជាពលរដ្ឋខ្មែរទាំងអស់ រួមទាំងលោកសួន សេរីរដ្ឋាផងដែរ។
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន
លោក សួន សេរីរដ្ឋា ត្រូវបានកម្លាំងសមត្ថកិច្ចចាប់ខ្លួនកាលពីថ្ងៃទ១៣ខែសីហាឆ្នាំមុន ក្រោយពេលដែលលោកបានបង្ហោះសារមួយនៅទំព័រហ្វេសប៊ុករបស់លោកដែលមានលក្ខណៈវាយប្រហារដល់កងទ័ព។
ក្រោយពេលលោក សួន សេរីរដ្ឋា ជាប់ឃុំ ហើយតុលាការកាត់ទោសឲ្យជាប់ពន្ធនាគារចំនួន៥ឆ្នាំ ប្រធានគណបក្សរូបនេះក៏បានធ្វើលិខិតលាលែងចេញពីតំណែង ហើយត្រូវគណបក្សធ្វើសមាជតែងតាំងលោក សួង សុភ័ណ្ឌជាប្រធានវិញ។
ក្នុងសេចក្តីថ្លែងការណ៍ដែលចុះហត្ថលេខាដោយលោក សួង សុភ័ណ្ឌ ប្រធានគណបក្សនេះបច្ចុប្បន្នកាលពីថ្ងៃទី២៦ខែសីហា មានខ្លឹមសារបញ្ជាក់ថា មិនមានផែនការធ្វើសមាជប្តូរមេដឹកនាំនោះទេ។