អតីតមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ថ្លែងបន្ទាប់ចេញពីពន្ធនាគារថា លោកមិននិយាយពីគុណធម៌ឬ រងសម្ពាធអន្តជាតិចំពោះការដោះលែងនេះទេ គឺលោកចង់ផ្តោតសំខាន់តែការរួបរួមជាតិ។
ក្រោយចេញពីពន្ធនាគារកាលពីយប់មិញ លោក មាជ សុវណ្ណារ៉ា បានថ្លែងអរគុណដល់លោកនាយករដ្ឋមន្ត្រីហ៊ុន សែន ដែលស្នើសុំព្រះមហាក្សត្រលើកលែងទោសដល់លោក។
ប៉ុន្តែលោកមិនវាយតម្លៃថា ការដោះលែងនេះជាគុណធម៌ ឬ ជាការដាក់សម្ពាធពីក្រុមណាមួយនោះទេ។
លោក មាជ សុវណ្ណារ៉ា ស្នើឲ្យលោកនាយករដ្ឋមន្ត្រីហ៊ុន សែន ដោះលែងលោក កឹម សុខា ដែលកំពុងជាប់ពន្ធាគារនៅត្រពាំងផ្លុង។
ខ្ញុំជឿថាមេដឹកនាំខ្មែរគាត់ឆ្លាតនិងចាប់ដៃគ្នាធ្វើការ ខ្ញុំអំពាវនាវដល់លោកនាយករដ្ឋមន្ត្រីហ៊ុន សែន ខ្ញុំអំពាវនាវដោយស្នាមញញឹមជាមួយព្រះករុណាជីវិតតម្កល់លើត្បូង សង្ឃឹមថា លោកនាយករដ្ឋមន្ត្រីហ៊ុន សែន នឹងពិចារណា សង្ឃឹមថា មេបក្សរបស់ខ្ញុំលោក កឹម សុខា នឹងត្រូវដោះលែង ព្រោះបើទុកទៀតវែងឆ្ងាយណាស់
អតីតមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណរា
លោក មាជ សុវណ្ណារ៉ា ហៅការដោះលែងអ្នកជាប់ឃុំ ឬ ហៅថា អ្នកទោសមនសិការបន្តបន្ទាប់នេះថា ជារបត់នយោបាយថ្មីដែលអ្នកនយោបាយខ្មែរត្រូវធ្វើការរួមគ្នាដើម្បីអភិវឌ្ឍន៍ប្រទេសឲ្យជឿនលឿនដូចប្រទេសជិតខាង។