អតីតមន្ត្រីនិងសកម្មជនគណបក្សសង្រ្គោះជាតិ(CNRP) អះអាងថា ពួកគេរង់ចាំគណបក្សនេះ ត្រូវបង្កើតឡើងវិញទើបចូលរួមសកម្មភាពនយោបាយជាមួយ ដោយមិនធ្វើសកម្មភាពជាមួយគណបក្សផ្សេងៗនោះទេ។
អតីតមន្ត្រីគណបក្សសង្រ្គោះជាតិ លោក មាជ សុវណ្ណារ៉ា បានលើកឡើងក្រោយពេលបញ្ចប់ពិធីសូត្រមន្ត និងស្រោចទឹករំដោះគ្រោះនៅវត្តពោធិយារាម ហៅវត្តចាស់ថា លោកជាប់គុកព្រោះរឿងនយោបាយ ដូច្នេះលោកនឹងនៅតែបន្តជីវិតនយោបាយជាមួយបក្សប្រឆាំងដដែល ដោយលោកមានជំនឿថាបក្សសង្គ្រោះជាតិ នឹងរស់ឡើងវិញ។ លោកបញ្ជាក់ដែរថា លោកគ្មានបំណងបង្កើតគណបក្សថ្មី ហើយក៏គ្មានបំណងចុះចូលជាមួយគណបក្សណាមួយនោះដែរ ។
អតីតមន្ត្រីគណបក្សសង្រ្គោះជាតិ លោក មាជ សុវណ្ណារ៉ា
ស្រដៀងគ្នានេះ លោក អឿ ណារិទ្ធ ក៏បានលើកឡើងថា ក្រោយពេលចេញពីពន្ធនាគារ លោកនឹងពង្រឹងសមត្ថភាពរបស់ខ្លួនទាំងចំណេះដឹងទូទៅ និង របៀបដឹកនាំ ដើម្បីឱ្យក្លាយជាបុគ្គលម្នាក់ឬ អ្នកដឹកនាំម្នាក់ប្រកបដោយគុណធម៌ និង សីលធម៌ល្អ។ ជាមួយគ្នានេះ លោកប្តេជ្ញាបន្តជីវិតនយោបាយជាមួយគណបក្សប្រឆាំងដដែល។
លោក អឿ ណារិទ្ធ
ចំណែកអតីតយុវជនគណបក្សសង្រ្គោះជាតិ លោក អាន បឋម បានលើកឡើងពីបញ្ហាប្រឈមនៅពេលជាប់ពន្ធនាគារ ដោយខាតបង់ស្ទើរគ្រប់យ៉ាង ដូចជាពេលវេលា ប្រាក់កាក់ ការរៀនសូត្រ ព្រមទាំងធ្វើឱ្យគ្រួសារជួបបញ្ហាប្រឈមក្នុងជីវភាពជាដើម។ យ៉ាងនេះក្តី នៅតែរក្សាជំហរថានឹងមិនរត់ចោលគណបក្សសង្រ្គោះជាតិឡើយ។
អតីតយុវជនគណបក្សសង្រ្គោះជាតិ លោក អាន បឋម
ដោយឡែកលោក សាន សីហៈ និងអ្នកផ្សេងទៀតដែលជាអតីតសកម្មជនបក្សសង្រ្គោះជាតិដែរនោះ ឱ្យដឹងថាការងារដំបូង នឹងត្រូវពិនិត្យសុខភាព រៀបចំខ្លួនឱ្យប្រសើរ ហើយនឹងបន្តការងារសង្គម និងការងារនយោបាយដដែល។ ពួកគេក៏ស្នើឱ្យមានការបង្រួបបម្រួលជាតិ និងផ្សះផ្សារជាតិពិតប្រាកដ ដោយមិនមែនគ្រាន់តែធ្វើឱ្យល្អមើលមួយពេលៗនោះទេ។
អតីតមន្ត្រី និងសកម្មជនគណបក្សសង្រ្គោះជាតិ ចំនួន១៤ នាក់ត្រូវបានព្រះមហាក្សត្រចេញព្រះរាជក្រឹត្យលើកលែងទោសកាលពីថ្ងៃទី ២៧ សីហា។ ពួកគេទាំង១៤នាក់ ត្រូវបានតុលាការក្រុងភ្នំពេញកាត់ទោសឱ្យជាប់ពន្ធនាគារម្នាក់ៗចន្លោះ ពី៧ ឆ្នាំ ទៅ ២០ឆ្នាំ កាលពីខែកក្កដាឆ្នាំ២០១៥ ពីបទ ចូលរួម និងដឹកនាំចលនាកុប្បកម្មដែលប្រព្រឹត្តនៅទីលានប្រជាធិបតេយ្យកាលពីឆ្នាំ២០១៤។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ការប្រកាន់ជំហរស្មោះស្ម័គ្រនឹងគណបក្សណាមួយគឺ ជាសិទ្ធិរបស់ពួកគេទាំងនោះ ប៉ុន្តែឱ្យសង្ឃឹមថា គណបក្សសង្រ្គោះជាតិអាចរស់ឡើងវិញបាន ហើយនឹងមានការដោះលែងលោកកឹម សុខា គឺ ជារឿងមិនអាចទៅរួចនោះទេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
អ្នកនាំពាក្យគណបក្សកាន់អំណាចរូបនេះ បន្ថែមថា ការដោះលែងជនជាប់ចោទ និង ទណ្ឌិតជាបន្តបន្ទាប់កន្លងមក គឺបង្ហាញពីគុណធម៌ និងស្មារតីបង្រួបបង្រួមជាតិរបស់ថ្នាក់ដឹកនាំប្រទេស។ មិនតែប៉ុណ្ណោះ ការដោះលែងជនទាំងនោះ ដោយផ្អែកទៅលើនិតិវធីច្បាប់ ការទទួលស្គាល់កំហុស និងប្តេជ្ញាចិត្តកែប្រែកំហុសរបស់ពួកគេទាំងនោះ និង ចុងក្រោយ ដោយសារមនោសញ្ចេតនា ព្រមទាំងសីលធម៌នយោបាយរបស់អ្នកដឹកនាំ។
ទោះបីយ៉ាងក៏ដោយ ប្រធានក្រុមអ្នកវិភាគវ័យក្មេង កញ្ញា លី ស្រីស្រស់ មើលមិនឃើញផ្លូវណាមួយ ដែលនឹងអាចឱ្យគណបក្សសង្រ្គោះជាតិរស់ឡើងវិញបាននោះទេ ប៉ុន្តែកញ្ញាថា អតីតមន្ត្រី និងសកម្មជនគណបក្សប្រឆាំងអាចបន្តជីវិតនយោបាយបាន គឺ ក្នុងទម្រង់គណបក្សប្រឆាំងណាមួយដែលនឹងបង្កើតឡើងថ្មី។ កញ្ញាថា ការអនុវត្តនីតិវិធី សម្រាប់បរិបទនៅកម្ពុជា ក៏អាចមើលទៅលើការចរចាផ្នែកនយោបាយផងដែរ។
ប្រធានក្រុមអ្នកវិភាគវ័យក្មេង កញ្ញា លី ស្រីស្រស់
ប្រធានក្រុមអ្នកវិភាគវ័យក្មេងដដែល មើលឃើញថាការឃុំខ្លួន ប្រធានអតិតគណបក្សសង្រ្គោះជាតិ លោក កឹម សុខា គឺ មិនមានផលចំណេញសម្រាប់រាជរដ្ឋាភិបាលទេ ប៉ុន្តែតែធ្វើឱ្យសហគមន៍អន្តរជាតិមើលឃើញពីចំណុចអវិជ្ជមានរបស់រដ្ឋាភិបាលបន្ថែមទៀត។ កញ្ញាមានជំនឿថា លោក កឹម សុខានឹងត្រូវដោះលែង ប៉ុន្តែមិនដឹងថាដោះលែងពេលណាប្រាកដ។
យ៉ាងក៏ដោយអ្នកវិភាគរូបនេះថា ការដោះលែងអ្នកជាប់ឃុំទាំងឡាយ មិនទាន់បង្ហាញពីការរួបរួមជាតិពិតប្រាកដទេ ពោលគឺនៅចាំមើលទៀតថាតើរដ្ឋាភិបាលមានឆន្ទៈដោះស្រាយបញ្ហាជាតិមួយនេះ ដោយកោះហៅអ្នកមានឥទ្ធិពលណាមួយមកពិភាក្សាគ្នា ដើម្បីបានជាប្រយោជន៍សម្រាប់ជាតិ នោះទើបបង្ហាញពីរូបភាពផ្សះផ្សារជាតិពិតប្រាកដ៕