សមត្ថកិច្ចខេត្តសៀមរាបឃាត់ខ្លួនថ្នាក់ដឹកនាំអង្គការដោះមីនចំនួន៣នាក់

សមត្ថកិច្ចខេត្តសៀមរាបបានឃាត់ខ្លួនប្រធានអង្គការដោះមីនកម្ពុជានិងជាប្រធានសារមន្ទីរមីនអាគីរ៉ារួមជាមួយបុគ្គិលិកដើម្បីសាកសួរពីការឆេះឃ្លាំងគ្រាប់ដែលបានកើតឡើងកាលពីថ្ងៃចន្ទដើមសប្តាហ៍នេះ។

អភិបាលស្រុកបន្ទាយស្រី លោក ណុប វុទ្ធី ប្រាប់VODឲ្យដឹងនៅថ្ងៃនេះថា កាលពីយប់ម្សិលមិញសមត្ថកិច្ចបានឃាត់ខ្លួនសហការីបីនាក់របស់អង្គការដោះមីនកម្ពុជានិងសារមន្ទីរមីនអាគីរ៉ា រួមមាន លោក អឿន យក្ស ជាប្រធាន លោក អឿន យុន អនុប្រធាន និងលោក ហ៊ាញ សុគន្ធា ប្រធានប្រតិបត្តិ ដើម្បីស្រាវជ្រាវពាក់ព័ន្ធករណីការឆេះឃ្លាំងគ្រាប់ដែលបានកើតឡើងកាលពីថ្ងៃទី២៧សីហានៅក្នុងបរិវេណសារមន្ទីរមីនក្នុងស្រុកបន្ទាយស្រី។

លោក ណុប វុទ្ធី បន្តឲ្យដឹងថា មូលហេតុដែលឆេះគឺដោយសារគ្រាប់ដែលដោះមកបន្សាបធ្លាក់ប៉ះរំសេវបង្កឲ្យឆាបឆេះឃ្លាំងនោះ ហើយឡានទឹកបានអន្តរាគមន៍ពន្លត់រួចរាល់ហើយដែរ។

លោកអភិបាលស្រុកបន្ទាយស្រីរូបនេះបញ្ជាក់បន្ថែមថា ករណីឆេះឃ្លាំងទំហំជាងមួយម៉ែត្រជាប់នៅខាងក្រោយសារៈមន្ទីរ មិនមានប៉ះពាល់ដល់មនុស្សនៅជុំវិញនោះទេ។

ឆ្នាំ១៩៩៧ លោកបានបង្កើតសារមន្ទីរមីនមួយដោយខ្លួនឯងនៅខេត្តសៀមរាប ហើយរហូតមកដល់បច្ចុប្បន្ននេះ សារមន្ទីរមីនរបស់លោកបានប្ដូរទីតាំងទៅស្រុកបន្ទាយស្រី ដោយមានទាំងចិញ្ចឹមកុមារកំព្រាចំនួនជិត៣០នាក់ទៀតផង។

ឆ្នាំ២០០៨ លោក អាគីរ៉ា បានបង្កើតអង្គការដោះមីនមួយឈ្មោះថាអង្គការដោះមីនកម្ពុជា ហើយអង្គការនេះមានការគាំទ្រថវិកាពីសហរដ្ឋអាមេរិក និងប្រទេសអូស្ត្រាលី៕