រាជបណ្ឌិតសភាកម្ពុជា បានប្រកាសថា កម្ពុជា និងរុស្ស៊ី បានសហការគ្នាបង្កើតមជ្ឈមណ្ឌលវិទ្យាសាស្រ្ត និងបច្ចេកវិទ្យានុយក្លេអ៊ែរលើកដំបូង ដែលនឹងឈានទៅដល់ការសាងសង់រោងចក្រអគ្គីសនីដើរដោយថាមពលនុយក្លេអ៊ែរនៅពេលខាងមុខ។
យោងតាមសេចក្តីប្រកាសព័ត៌មានកាលពីថ្ងៃទី២៨ សីហា រាជបណ្ឌិតសភាកម្ពុជា បានប្រកាសថា កម្ពុជា និងរុស្ស៊ី បានឈានដល់សេចក្តីសម្រេចរួមលើការសាងសង់មជ្ឈមណ្ឌលនុយក្លេអ៊ែរជាលើកដំបូង ខណៈពន្ធនាំចូលសម្ភារៈសាងសង់មួយចំនួន នឹងត្រូវលើកលែងផងដែរ។
ទោះជាយ៉ាងណា រាជបណ្ឌិសភាមិនបានបញ្ជាក់ទេថា មជ្ឈមណ្ឌលនោះនឹងសាងសង់នៅកន្លែងណា និងចាប់ផ្តើមនៅពេលណានោះទេ ខណៈថា នឹងមានកិច្ចប្រជុំចុងក្រោយនាខែវិច្ឆិកាខាងមុខ។
បើតាមរាជបណ្ឌិតសភា នៅពេលនេះ ក្រុមការងារកម្ពុជានឹងធ្វើការបកប្រែឯកសារសិក្សាអំពីនុយក្លេអ៊ែរឲ្យចប់នៅចុងខែកញ្ញា ខណៈ រុស្ស៊ី ប្រកាសចូលរួមរៀបចំព្រឹត្តិការណ៍ផ្សេងទៀតទាក់ទងនឹងវិស័យនុយក្លេអ៊ែរជាមួយកម្ពុជានាខែវិច្ឆិកាខាងមុខនេះ។
VOD មិនអាចទាក់ទងអគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាពដែលដឹកនាំកម្ពុជាក្នុងកិច្ចប្រជុំទាក់ទងនឹងរឿងនេះ លោក ទិន ពន្លក បាននៅឡើយទេ។
ការសាងសង់មជ្ឈមណ្ឌលវិទ្យាសាស្ត្រនុយក្លេអ៊ែរនេះ គឺជាការបោះជំហានមួយរបស់កម្ពុជា មុនការបង្កើតរោងចក្រថាមពលអគ្គីសនីដើរដោយថាមពលនុយក្លេអ៊ែរនាពេលខាងមុខ ដែលត្រូវការអ្នកជំនាញរុស្ស៊ីជាអ្នកផ្តល់នូវការស្រាវជ្រាវ និងបណ្តុះបណ្តាលដល់មន្ត្រីកម្ពុជាលើវិស័យនេះ។
ក្នុងដំណើរទស្សនកិច្ចរបស់នាយករដ្ឋមន្ត្រីកម្ពុជា លោក ហ៊ុន សែន ទៅកាន់ប្រទេសរុស្ស៊ីកាលពីខែឧសភា ឆ្នាំ២០១៦ ប្រទេសរុស្ស៊ី បានសន្យាជួយកម្ពុជាបង្កើតមជ្ឈមណ្ឌលព័ត៌មានថាមពលនុយក្លេអ៊ែរ និងបង្កើតក្រុមការងារចំពោះកិច្ចកម្ពុជា-រុស្ស៊ី សហការលើការប្រើប្រាស់ថាមពលនុយក្លេអ៊ែរស៊ីវិលផងដែរ ដែលកិច្ចព្រមព្រៀងទាំងនេះ នឹងចាប់អនុវត្តនៅឆ្នាំ២០២០ខាងមុខ៕