អតីតមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ដែលទើបចេញពីពន្ធនាគារបានប្រាប់មន្ត្រីស្ថានទូតអាមេរិកថាលោកនៅបន្តធ្វើអ្នកនយោបាយប្រឆាំងដដែលបើទោះជាមិនមានបក្ស។
ប្រាប់VODតាមទូរសព្ទកាលពីម្សិលមិញ លោក មាជ សុវណ្ណារ៉ា ឲ្យដឹងថាលោកបានទៅជួបមន្ត្រីស្ថានទូតអាមេរិកកាលពីថ្ងៃពុធកន្លងទៅ ដោយថានោះជាជំនួបដើម្បីសួរសុខទុក្ខក្នុងនាមលោកជាពលរដ្ឋដែលមានសញ្ញាតិអាមេរិក។
លោក មាជ សុវណ្ណារ៉ា មានប្រសាសន៍បន្ថែមថា លោកនៅតែបន្តធ្វើអ្នកនយោបាយប្រឆាំងដដែលបើទោះជាមិនមានគណបក្សដោយបញ្ជាក់ថា លោកយកវោហារសាស្ត្រដើម្បីអប់រំប្រជាពលរដ្ឋឲ្យស្គាល់ពីគោលការណ៍លទ្ធិប្រជាធិបតេយ្យនិងសិទ្ធិមនុស្ស។
កាលពីថ្ងៃទី២០ ខែកក្កដា ឆ្នាំ២០១៥ សាលាដំបូងរាជធានីភ្នំពេញបានកាត់ទោស លោក មាជ សុវណ្ណារ៉ា ដាក់ពន្ធនាគាររយៈពេល២០ឆ្នាំពីបទដឹកនាំនិងចូលរួមចលនាកុបកម្ម បន្ទាប់ពីការតវ៉ាឲ្យបើកទីលានប្រជាធិបតេយ្យចាស់កាលពីថ្ងៃទី១៥ ខែកក្កដា ឆ្នាំ២០១៤។
លោក មាជ សុវណ្ណារ៉ា និងអតីតសកម្មជនគណបក្ស សង្គ្រោះជាតិ១៤នាក់ទៀតដែលជាប់ឃុំ ត្រូវតុលាការដោះលែង កាលពីដើមសប្តាហ៍នេះ ដោយលោកនាយករដ្ឋមន្ត្រី ហ៊ុន សែន ដែលស្នើសុំព្រះមហាក្សត្រលើកលែងទោស៕
