លោកនាយករដ្ឋមន្ត្រីហ៊ុន សែន ស្នើទៅព្រះមហាក្សត្រដាក់មន្ត្រីជាន់ខ្ពស់នគរបាលជាតិចំនួន១០រូបឲ្យចូលនិវត្តន៍ ស្របពេលជាមួយគ្នានេះ លោកក៏បានស្នើដំឡើងតួនាទីមន្ត្រី៣រូបផ្សេងទៀត។
កាលពីថ្ងៃសុក្រម្សិលមិញ លោកនាយករដ្ឋមន្ត្រីហ៊ុន សែន ដាក់លិខិតពីរផ្សេងគ្នាថ្វាយព្រះមហាក្សត្រ។
លិខិតទី១ស្នើដាក់ឧត្តមសេនីយ៍១០រូបឲ្យចូលនិវត្តន៍រួមមាន លោក ម៉ៅ ប៊ុនណារិន, លោក សុខ ផល, លោក ម៉ៅ ច័ន្ទតារា, លោក ថោង សំអាត, លោក ផាន ពៅ, លោក មូន សារ៉ន, លោក សួស អង្គារ៍, លោក ជួន សុវណ្ណ, លោក ឯម សំណាង និង លោក លី កឹមឡុង។
ចំណែកលិខិតទី២ ស្នើដំឡើងតំណែងឧត្តមសេនីយ៍៣រូបរួមមានលោក គៀត ច័ន្ទថារិទ្ធ អគ្គស្នងការរងនគរបាលជាតិ ដំឡើងទៅជាអគ្គនាយក នៃអគ្គនាយកដ្ឋានអន្តោប្រវេសន៍ ជំនួស លោក សុខ ផល។លោក កង សុខន អគ្គស្នងការរងនគរបាលជាតិ ដំឡើងទៅជាអគ្គនាយក នៃអគ្គនាយកដ្ឋានអត្តសញ្ញាណកម្ម ជំនួសលោក ម៉ៅ ច័ន្ទតារា។ លោក សេង យូ អ៊ាន់ អគ្គនាយករង ដំឡើងទៅជាអគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ ជំនួសលោកលោក ម៉ៅ ប៊ុនណារិន។
