ខណៈដែលករណីល្ខោនខោលបានក្លាយជាជម្លោះពាក្យសម្ដីខ្លាំងឡើងរវាងអ្នកគាំទ្រវប្បធម៌ថៃ និងម្ចាស់ដើមគឺកម្ពុជានោះ លោក នូ សុផេន ដែលត្រូវគេស្គាល់ថាបានរួមចំណែកបំផុសល្ខោនខោល នៅក្នុងកម្មវិធីរបស់ទូរទស្សន៍អប្សរានាពេលកន្លងមក និងជាអ្នកស្រាវជ្រាវសិល្បៈបុរាណខ្មែរមួយរូបដែរ បានអះអាងថា នេះជាករណីដ៏រសើបដែលគួរតែមានវិធានការបង្ការទុកកុំអោយកើតមាន។
លោកបានបញ្ជាក់ថា បើស្ថាប័នពាក់ព័ន្ធធំ២មិនធ្វើរបងលើករណីនេះទេ នោះបញ្ហាជម្លោះនឹងកើតមានឡើងមិនឈប់នោះទេ នាពេលដែលខ្មែរខ្លួនឯងមិនសូវរួមគ្នាគាំទ្រវប្បធម៌បុរាណរបស់ខ្លួន ហើយដល់ពេលប្រទេសជិតខាងគេចងក្រងយកទៅដាក់ជាបេតិកភណ្ឌពិភពលោក ទើបនាំគ្នាពុះកញ្ជ្រោល។
លោក នូ សុផេន អនុប្រធាននាយកដ្ឋានផលិតកម្មវិធីប្រចាំទូរទស្សន៍អប្សរា បានអះអាងថា នាពេលកន្លងមក លោកបានស្រាវជ្រាវ និងព្យាយាមបំផុសបំផុលលើទម្រង់ល្ខោនខោលនេះខ្លាំងណាស់ ដោយបានទាំងបង្កើតកម្មវិធីលើកស្ទួយទម្រង់នេះ ទាំងទទួលបានការគាំទ្រតិចតួចពីម្ចាស់ក្រុមហ៊ុននានានោះផង។
លោកសម្ដែងអារម្មណ៍រីករាយ ដែលស្រទាប់មហាជន និងអ្នកលេងហ្វេសប៊ុកច្រើនឡើងរួមគ្នាបំផុស និងចែកចាយអោយជាតិ និងអន្តរជាតិបានស្គាល់កាន់តែច្បាស់ពីល្ខោនខោលរបស់ខ្មែរ ក្នុងពេលមានដំណឹងថាសិល្បៈមួយនេះ គឺភាគីប្រទេសថៃ កំពុងស្វះស្វែងដាក់បញ្ចូលជាសម្បត្តិបេតិកភ័ណ្ឌពិភពលោក ដែលក្នុងពេលដ៏ខ្លីអង្គការយូនីស្កូ នឹងធ្វើការសម្រេចថាឲ្យជារបស់ថៃ ឬឲ្យខ្មែរ។
លោកថានេះជាទង្វើដ៏ប្រពៃ ដែលខ្មែរមានការសាមគ្គី ប៉ុន្តែលោកមិនចង់នៅតែបន្តឃើញស្ថានភាពរបស់យុវជនខ្មែរ និងមហាជនខ្មែរ ពុះកញ្ជ្រោលតែមួយពេលៗបែបនេះនោះទេ គឺគួរតែមានវិធានការជាងនេះ ដើម្បីកុំអោយស្ថានភាពប្រទាញប្រទង់រវាងវប្បធម៌ខ្មែរ និងប្រទេសជិតខាង ជាពិសេសគឺថៃ នៅតែមានរឿងមិនឈប់។
លោកថាប្រទេសជិតខាងគ្នាដែលមានវប្បធម៌ស្រដៀងគ្នា ឬចាំតែចម្លងពីខ្មែរ គេចាំតែឆ្មក់ឱកាសនូវទម្រង់វប្បធម៌ណាមួយ ដែលខ្មែរមិនសូវមានការចាប់អារម្មណ៍ ដើម្បីរៀបចំឯកសារដាក់បញ្ចូលទៅក្នុងបេតិកភ័ណ្ឌពិភពលោកប៉ុណ្ណោះ ស្របគ្នាដែលនៅកម្ពុជាក៏មិនសូវមានកម្មវិធីបំផុសអោយស្គាល់ពីទម្រង់សិល្បៈបុរាណទាំងឡាយអោយក្មេងជំនាន់ក្រោយស្គាល់ផង។
លោកថាជារឿងសង្វេគដែលក្នុងកញ្ចក់ទូរទស្សន៍ក្នុងស្រុកស្ទើរតែគ្រប់ប៉ុស្ដិ៍ទាំងអស់ មិនមានការបំផុសអោយដឹងអោយស្គាល់ពីទម្រង់សិល្បៈបុរាណទាំងនេះ ដោយលោកនិយាយយ៉ាងខ្លីថា តើមានក្មេងប៉ុន្មាននាក់ តើមានមហាជនប៉ុន្មានភាគរយ ដែលចាប់អារម្មណ៍ពីល្ខោនខោលកន្លងមក។
ជាក់ស្ដែងមុនពេលមានដំណឹងថាថៃបានស្នើទម្រង់នេះធ្វើជារបស់ខ្លួន គឺការសម្ដែងល្ខោនខោលកន្លងសឹងមិនមានមនុស្សទៅទស្សនាតែម្ដង លើកលែងតែកម្មវិធីនោះ មានការចូលរួមពីគណអធិបតីធំៗម្ដងម្កាល។ លោកថានេះមិនមែនជាកំហុសរបស់មហាជនទេ ប៉ុន្តែជាការខ្វះការអន្តរាគមន៍ពីស្ថាប័ន ដែលមិនបានដាក់កំហិតទៅដល់បណ្ដាទូរទស្សន៍ក្នុងស្រុក អោយរួមគ្នាបង្កើតកម្មវិធីលើកស្ទួយវប្បធម៌ ក្នុងន័យបំផុសទម្រង់បុរាណ។
លោក នូ សុផេន បន្តថា ដើម្បីចូលរួមអភិរក្សសិល្បៈបុរាណរបស់ខ្មែរកុំអោយប្រទេសជិតខាងយកជារបស់ខ្លួនបាន ក្រសួងពាក់ព័ន្ធរួមមានក្រសួងវប្បធម៌ និងក្រសួងព័ត៌មាន គួរតែមានម៉ោងកំណត់មួយឲ្យដូចៗគ្នា តម្រូវអោយបណ្ដាទូរទស្សន៍ទាំងអស់ត្រូវតែមានកម្មវិធីពាក់ព័ន្ធនឹងទម្រង់សិល្បៈបុរាណឲ្យដូចគ្នានៅក្នុងម៉ោងណាមួយជាក់លាក់ ពោលគឺធ្វើដូចការកំណត់ឲ្យមានភាពយន្តខ្មែរដាក់ផ្សាយក្នុងម៉ោងស្របគ្នា នៅចន្លោះពីម៉ោង៧ ដល់ម៉ោង៩ដូច្នោះដែរ ដើម្បីអោយក្រុមសិល្បៈបែបបុរាណក៏មានការងារ និងជាការបំផុសអោយស្រទាប់មហាជនងាកទៅណាក៏ឃើញ ពីទម្រង់បុរាណរបស់ខ្លួន ដើម្បីកុំអោយប្រទេសជិតខាងដែលមានបំណងចង់ចម្លង និងលួចនូវវប្បធម៌ខ្មែរមានការខ្លាចរអារ។
លោកថាវាមិនអាចទៅរួចបានទេ ប្រសិនមានតែប៉ុស្ដិ៍ទូរទស្សន៍មួយ ឬ២ ប្រឹងធ្វើកម្មវិធីលើកស្ទួយទម្រង់បុរាណ ខណៈដែលប៉ុស្ដិ៍ទូរទស្សន៍ស្ទើរទាំងអស់ខ្វល់តែរឿងផលិតកម្មវិធីយកលុយពីស្ពុនស័រ ដោយមិនខ្វល់ពីការជួយបំផុសទម្រង់បុរាណអោយសាធារណជនជាតិ និងអន្តរជាតិបានឃើញ។
លោកថាបរិបទបែបនេះ បើរង់ចាំអោយបណ្ដាទូរទស្សន៍មានចិត្តប្រជែងគ្នាផលិតកម្មវិធីទម្រង់បុរាណៗ ដូចជាការបំផុសល្ខោនខោលជាដើម គឺមិនអាចនោះទេ ដរាបណាមិនមានការកំណត់ឲ្យតម្រូវផ្សាយសិល្បៈបុរាណក្នុងម៉ោងណាមួយស្របគ្នា ដូចករណីម៉ោងមាសសម្រាប់ភាពយន្តខ្មែរកន្លងមក។
ពាក់ព័ន្ធនឹងអ្វីដែលលោកលើកឡើង ក៏មានសំណូមពរពីស្រទាប់មហាជន និងតារាសិល្បៈរៀមច្បងកន្លងមកផងដែរ ប៉ុន្តែគេនៅតែមិនទាន់បានទទួលប្រតិកម្មពីក្រសួងវប្បធម៌ និងក្រសួងព័ត៌មាន បន្ទាប់ពីករណីស្នើអោយដាក់បញ្ចាំងភាពយន្តខ្មែរក្នុងម៉ោងមាស ដែលបានទទួលជោគជ័យ គឺដោយសារតែមានញត្តិស្នើទៅកាន់ក្រសួងផង និងរដ្ឋាភិបាលផង បន្ថែមពីលើសំណើរ និងប្រតិកម្មដូចពេលនេះ៕
