អាជ្ញាធរខេត្តស្ទឹងតែង បានបញ្ជាក់ថា ការបាត់ស្រុតស្ពានអូរគួក នៅឃុំសន្តិភាព ស្រុកសៀមប៉ាង គឺមិនបណ្តាលឱ្យមានមនុស្សគ្រោះថ្នាក់នោះឡើយ ហើយមន្ត្រីជំនាញកំពុងសិក្សាអំពីទំហំការខូតខាតបន្ថែមទៀត។
អ្នកនាំពាក្យសាលាខេត្តស្ទឹងត្រែង លោក ម៉ែន គុង ឱ្យវីអូឌី(VOD) ដឹងនៅថ្ងៃនេះថា ស្ពានអូរគួក ដែលត្រូវបានកសាងឡើងដោយកម្លាំងកងវិស្វកម្មកម្ពុជារួចរាល់ហើយ ប៉ុន្តែ មិនទាន់បានដាក់សម្ភោធឱ្យប្រើប្រាស់ជាផ្លូវការទេនោះ ត្រូវរងការបាក់ស្រុតដោយសារទឹកជំនន់ដែលបានកើតឡើងជាងមួយខែមកនេះ។ លោកបន្តថា ដោយសារស្ពាននេះ រងការខូចខាតដោយគ្រោះធម្មជាតិ ដូច្នេះអាជ្ញាធរខេត្តមិនមានគម្រោងស៊ើបអង្កេតឱ្យលើសពីនេះទេ។
អ្នកនាំពាក្យសាលាខេត្តស្ទឹងត្រែង លោក ម៉ែន គុង
ស្ពានអូរគួក មានប្រវែង ២៥០ម៉ែត្រ ឆ្លងកាត់ទន្លេសេងកុង ក្បែរព្រំដែនកម្ពុជា-ឡាវ នៅភូមិសាស្ត្រឃុំសន្តិភាព ស្រុកសៀមប៉ាង ត្រូវបានបាក់ស្រុត កាលពីថ្ងៃទី១ កញ្ញា នៅផ្នែកម្ខាងនៃក្បាលស្ពាន។
អ្នកនាំពាក្យសាលាខេត្តស្ទឹងត្រែងដដែល បញ្ជាក់ថា អាជ្ញាធរបានជូនដំណឹងអំពីការបាក់ស្រុតស្ពាននេះ ទៅកាន់ប្រជាពលរដ្ឋហើយ ដោយមិនអនុញ្ញាតឱ្យពួកគាត់ឆ្លងកាត់ឡើយ ជៀសវាងមានគ្រោះថ្នាក់ផ្សេងៗ ហើយពលរដ្ឋត្រូវឆ្លងតំបន់នោះដោយទូកជំនួសវិញ។
លោកបន្ថែមថា គ្រោះទឹកជំនន់ជាង ១ខែមកនេះ បានបង្កផលប៉ះពាល់ដល់ពលរដ្ឋទូទាំងខេត្តចំនួនជាង ៥ពាន់គ្រួសារ និងប៉ះពាល់ដល់ផលដំណាំកសិកម្ម និង កសិ-ឧស្សាហ៍កម្ម ព្រមទាំងដំណាំរួមផ្សំជិត ២ពាន់ហិកតា។
គ្រោះទឹកជំនន់បណ្តាលឱ្យស្ពានចំនួន ៣៧កន្លែងនៅក្នុងខេត្តនេះ រងការបាក់ស្រុត និងខូចខាត ព្រមទាំងបណ្តាលឱ្យប៉ះពាល់ហេដ្ឋារចនាសម្ព័ន្ធផ្សេងទៀតផងដែរ។
លោកបញ្ជាក់ថា បញ្ហាទាំងនេះ ស្ថាប័នជំនាញកំពុងសិក្សាពីផលប៉ះពាល់ទាំងនោះបន្ថែមទៀត ដើម្បីស្តារ និងជួសជុលឡើងវិញ ក្រោយពេលទឹកស្រក។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ការខូចខាតហេដ្ឋារចនាសម្ព័ន្ធដោយសារគ្រោះធម្មជាតិនៅខេត្តស្ទឹងត្រែងពេលនេះ គឺជាមេរៀនមួយសម្រាប់សិក្សាទៅលើការកសាងហេដ្ឋារចនាសម្ព័ន្ធប្រកបដោយគុណភាពខ្ពស់ និងគិតគូរអំពីហានិភ័យផ្សេងៗ ដើម្បីទប់ទល់ទៅនឹងគ្រោះធម្មជាតិដែលនឹងកើតឡើងនៅពេលខាងមុខ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ
មន្ត្រីសង្គមស៊ីវិលដដែល យល់ថា ប្រសិនបើស្ថាប័នពាក់ព័ន្ធមិនបានយកករណីទាំងនេះ មកសិក្សាឱ្យស៊ីជម្រៅទេ នោះការខាតបង់ថវិកាជាតិក្នុងការកសាងហេដ្ឋារចនាសម្ព័ន្ធសង្គមដោយសារគ្រោះធម្មជាតិ នឹងកើតមានឡើងបន្តទៀត៕
