ក្នុងអំឡុងពេលដែលវៀតណាមរៀបចំពិធីបុណ្យឯករាជ្យជាតិខួប៧៣ឆ្នាំ ដែលប្រព្រឹត្តិទៅថ្ងៃទី២ខែកញ្ញាឆ្នាំ២០១៨នេះ មានការចាប់ខ្លួន និងដាក់វិធានការតឹងរឹងទៅក្រុមដែលរដ្ឋាភិបាលចាត់ទុកថា ជាក្រុមភេរវកម្មឬ ជាក្រុមបះបោរចង់ផ្តួលរំលំរដ្ឋាភិបាល។
នៅចំថ្ងៃរៀបចំពិធីបុណ្យឯករាជ្យជាតិនេះ អាជ្ញាធរវៀតណាមឃាត់ខ្លួនមនុស្ស៧នាក់ ដែលរងការចោទថា ជាសមាជិករដ្ឋាភិបាលស្រមោសវៀតណាមដែលបង្កើតដោយជនជាតិវៀតណាមួយក្រុមមានមូលដ្ឋាននៅក្នុងប្រទេសកាណាដា។
តាមការអះអាងរបស់នគរបាលវៀតណាមបានឲ្យដឹងថា ក្នុងចំណោមអ្នកដែលត្រូវបានចាប់ខ្លួននោះពាក់ព័ន្ធជាមួយការវាយប្រហារដោយបំផ្ទុះគ្រាប់បែកនៅប៉ុស្តិ៍នគរបាលក្នុងទីក្រុងហូជីមិញកាលពីខែមិថុនាកន្លងទៅនេះ។
ក្រៅពីមនុស្ស៧នាក់នេះ ក៏មានការចាប់ខ្លួនអ្នកផ្សេងៗទៀតបន្តបន្ទាប់ដែលរងការចោទថា ធ្វើចលនាប្រឆាំងរដ្ឋាភិបាល។
បើទោះបីជា រដ្ឋាភិបាលដាក់វិធានការតឹងរឹង និងបានចាប់ខ្លួនមនុស្សជាបន្តបន្ទាប់ក៏ដោយ ក៏ព័ត៌មានទាំងនេះ រដ្ឋាភិបាលវៀតណាមមិនបានផ្សព្វផ្សាយបើកទូលាយនោះទេ។
កាលពីឆ្នាំ២០១៧ រដ្ឋាភិបាលវៀតណាមក៏បានបើកយុទ្ធនាការទ្រង់ទ្រាយធំ ចាប់ខ្លួនសមាជិករដ្ឋាភិបាលស្រមោលវៀតណាមចំនួន១៥នាក់ ដែលរងការចោទថា ប៉ុនប៉ងបំផ្ទុះគ្រាប់បែកនៅកន្លែងផ្ទុកប្រេងនៅព្រលានយន្តហោះអន្តរជាតិTan Son Nhat។
វិធានការរឹតបន្តឹងលើក្រុមប្រឆាំងនេះគឺ កាន់តែខ្លាំងឡើងជាបន្តបន្ទាប់ ចាប់តាំងពីឆ្នាំ២០១៦មកគឺក្រោយពេលលោក ង្វ្រៀន សួនផុក(Nguyen Xuan Phuc) ជាប់ឆ្នោតជានាយករដ្ឋមន្ត្រី។
ចលនារដ្ឋាភិបាលស្រមោលបង្កើតឡើងកាលពីឆ្នាំ១៩៩១ ដោយលោក Dao Minh Quan កើតនៅក្នុងខេត្តThien Hue នៅភាគកណ្តាលនៃប្រទេសកាលពីឆ្នាំ១៩៥២។ លោក ក៏ជាអតីតមេបញ្ជាការកងទ័ពវៀតណាមដែរ។
រដ្ឋាភិបាលស្រមោលវៀតណាមនេះ បង្កើតឡើងនៅក្នុងរដ្ឋកាលីហ្វ័រញ៉ាសហរដ្ឋអាមេរិក ដែលកាលនោះ មានការទាមទារឲ្យមានការបោះឆ្នោតក្នុងការជ្រើសរើសមេដឹកនាំ។ បច្ចុប្បន្នរដ្ឋាភិបាលស្រមោលនេះ ដូរទីតាំងទៅក្នុងប្រទេសកាណាដាវិញ។
វៀតណាមធ្លាប់បែងចែកប្រទេសជាពីរចន្លោះពីឆ្នាំ១៩៥៤ដល់១៩៧៥ កាលនោះវៀតណាមខាងជើងដឹកនាំតាមរបបកុម្មុយនីស្ត ចំណែកវៀតណាមខាងត្បូងដឹកនាំតាមរបបប្រជាធិបតេយ្យ។ ក្រោយពេលសង្គ្រាមរវាងវៀតណាមទាំងពីររយៈពេល២០ឆ្នាំ គឺនៅឆ្នាំ១៩៧៥ វៀតណាមខាងជើងឈ្នះវៀតណាមខាងត្បូង ហើយការគ្រប់គ្រងប្រែទៅជាកុម្មុយនីស្តទាំងអស់វិញ។
នៅក្នុងអំឡុងឆ្នាំ២០១៧ និងឆ្នាំ២០១៨ រដ្ឋាភិបាលវៀតណាមបានចាប់ខ្លួនថ្នាក់ដឹកនាំជាន់ខ្ពស់មួយចំនួនដែលចោទថា ពាក់ព័ន្ធអំពើពុករលួយ និងការរំលោភអំណាចរដ្ឋក្នុងនោះក៏មានទាំងអតីតសមាជិកបក្សកុម្មុយនីស្តវៀតណាម និងជាអតីតប្រធានធនាគារជាតិវៀតណាមផងដែរ។
បើទោះជារដ្ឋាភិបាលវៀតណាមចោទមន្ត្រីជាន់ខ្ពស់ទាំងនោះថា មានកំហុសផ្សេងៗក៏ដោយប៉ុន្តែក្រុមអ្នកឃ្លាំមើលមួយចំនួនអះអាងថា អ្នកទាំងនោះមួយចំនួនគឺពាក់ព័ន្ធចលនាវៀតណាមសេរី។