មេដឹកនាំចិន បានអបអរសាទរដល់លោក ហ៊ុន សែន តែប៉ុន្មានប៉ុណ្ណោះ ក្រោយពីមេដឹកនាំបក្សកាន់អំណាចរូបនេះ ត្រូវបានជ្រើសតាំងជានាយករដ្ឋមន្ត្រីកម្ពុជាជាថ្មីម្ដងទៀត។
ក្នុងលិខិតអបអរដែលត្រូវបានបកប្រែក្រៅផ្លូវការ និងផ្សព្វផ្សាយនៅថ្ងៃនេះ នាយករដ្ឋមន្ត្រីចិន លោក លី ឃឹងជាំង បានលើកឡើងថា ក្រោមការដឹកនាំដ៏រឹងមាំរបស់លោក ហ៊ុន សែន ប្រជាជនកម្ពុជាសម្រេចបាននូវការអភិវឌ្ឍដ៏សម្បើម នៅក្នុងបុព្វហេតុនៃការកសាងជាតិ។
មេដឹកនាំចិនរូបនេះ បានលើកឡើងបន្ថែមថា រដ្ឋាភិបាលចិនបង្ហាញការយល់ឃើញយ៉ាងជ្រាលជ្រៅថា លោក ហ៊ុន សែន នឹងបន្តដឹកនាំប្រជាជនកម្ពុជា ដើម្បីកសាងប្រទេសឲ្យកាន់តែខ្លាំងក្លា និងប្រកបដោយវិបុលភាពបន្ថែមទៀត។
លោក លី បានផ្ញើសារអបអរលោក ហ៊ុន សែន បែបនេះ តែប៉ុន្មានម៉ោងប៉ុណ្ណោះ ក្រោយពីមេដឹកនាំគណបក្សប្រជាជនកម្ពុជារូបនេះ ត្រូវបានសមាជិកសភាមកពីគណបក្សកាន់អំណាចទាំងអស់ ជ្រើសតាំងរូបលោកជានាយករដ្ឋមន្ត្រីជាថ្មីម្ដងទៀតនៅថ្ងៃនេះ៕
