លោក ហ៊ុន សែន នឹងអញ្ជើញទៅប្រទេសចិនមុនគេ បន្ទាប់ពីលោកជាប់ឆ្នោតជានាយករដ្ឋមន្រ្តីនៅអាណត្តិទី៦នេះ ។
យោងតាមសេចក្ដីប្រកាសព័ត៌មានដែលចេញដោយក្រសួងការបរទេសនិងសហប្រតិបត្តិការ អន្ដរជាតិ ដែលចេញនៅថ្ងៃនេះថា លោក ហ៊ុន សែន នឹង ចូលរួមពីធីតាំងពិព័រណ៍ចិន-អាស៊ានលើកទី១៥ ដែលមានរយៈពេល៣ថ្ងៃ ដោយចាប់ពីថ្ងៃទី១០ ដល់ថ្ងៃទី១២ ខែកញ្ញា ឆ្នាំ២០១៨នេះ នៅក្នុងទីក្រុងណាននីង ខេត្តក្វាងស៊ី តាមការអញ្ជើញរបស់រដ្ឋាភិបាលនៃសាធារណរដ្ឋប្រជាមានិតចិន។
នៅក្នុងការតាំងពិពណ៌នេះលោក ហ៊ុន សែន នឹងថ្លែងសុន្ទរកថាគន្លឹះនឹងពិធីបើកពិព័រណ៌ចិន-អាស៊ានលើកទី១៥ ក្នុងគោលបំណងលើកស្ទួយពាណិជ្ជកម្ម និងវិនិយោគរវាងអាស៊ាន និងចិន។
ក្រសួងក៏បានបន្ដទៀតថា អំឡុងពេលស្នាក់នៅប្រទេសចិន លោក ហ៊ុន សែន នឹងជួបពិភាក្សាដាច់ដោយឡែកជាមួយឥស្សរជនចិន និងទទួលការជួបសម្ដែងការគួរសមពីថ្នាក់ដឹកនាំខេត្តក្វាងស៊ី និងថ្នាក់ដឹកនាំធុរកិច្ចសំខាន់ៗទៀត។
នាយករដ្ឋមន្ត្រីចិន លោក លី ឃឹងជាំង កាលពីម្សិលមិញ បានអបអរសាទរដល់លោក ហ៊ុន សែនដែលត្រូវបានជ្រើសតាំងជានាយករដ្ឋមន្ត្រីកម្ពុជាជាថ្មីម្ដងទៀត ហើយលើកឡើងថា ក្រោមការដឹកនាំដ៏រឹងមាំរបស់លោក ហ៊ុន សែន ប្រជាជនកម្ពុជាសម្រេចបាននូវការអភិវឌ្ឍដ៏សម្បើម នៅក្នុងបុព្វហេតុនៃការកសាងជាតិ៕