ក្រសួងការពារជាតិបានធ្វើពិធីប្រកាសតែងតាំងកូនប្រុសច្បងលោកនាយករដ្ឋមន្ដ្រី ហ៊ុន សែន ជាមេបញ្ជាការកងទ័ពជើងគោក រួមជាមួយនាយទាហានជាន់ខ្ពស់២នាក់ទៀត។
ពីធីនេះបានធ្វើឡើងនៅវិមានសន្តិភាពនៅរសៀលនេះ ដោយមានការចូលរួមពីរដ្ឋមន្ត្រីការពារជាតិ លោក ទៀ បាញ់ ប្រកាសតែងតាំងដំឡើងឋានន្ដរស័ក្ដិ លោក ហ៊ុន ម៉ាណែត ធ្វើជាមេបញ្ជាការកងទ័ពជើងគោក លោក ឥត សារ៉ាត់ ជានាយសេនាធិការចម្រុះ និង លោក វង្ស ពិសេន ជាអគ្គមេបញ្ជាការនៃកងយោធពលខេមរភូមិន្ទ។
គួររម្លឹកថា លោក ហ៊ុន ម៉ាណែត បានកាន់តំណែងជាមេបញ្ជាការស្ដីទីនៃកងទ័ពជើងគោកបន្ទាប់ពី លោក មាស សុភា បានលាលែងពីតំណែងទៅឈរឈ្មោះជាតំណាងរាស្ត្រសម្រាប់ការបោះឆ្នោតសភាអាណត្តិទី៦ កាលពីចុងខែកក្កដាកន្លងមក៕
