ប្រធានាធិបតីសហរដ្ឋអាមេរិកលោក ដូណាល់ ត្រាំ កាលពីថ្ងៃព្រហស្បតិ៍ម្សិលមិញ បានប្តេជ្ញាជាថ្មីទៀតថា នឹងធ្វើការឲ្យស្និទ្ធជាមួយរបបកូរ៉េខាងជើងក្នុងការលុបបំបាត់កម្មវិធីអាវុធនុយក្លេអ៊ែនៅឧបទ្វីបកូរ៉េឲ្យទាល់តែបាន។
ការបង្ហាញជំហរជាថ្មីនេះ ធ្វើឡើងបន្ទាប់ពីប៉ុន្មានសប្តាហ៍មុន លោក ត្រាំ បង្ហាញក្តីអស់សង្ឃឹមថា ការចរចាដោះស្រាយកម្មវិធីអាវុធនុយក្លេអ៊ែជាមួយកូរ៉េខាងជើងមិនមានការរីកចម្រើនទេ។
កាលពីថ្ងៃព្រហស្បតិ៍ម្សិលមិញ លោក ត្រាំ សរសេរសារនៅលើបណ្តាញសង្គមTwitter ថា លោក អរគុណ ដល់លោក គីម ជុងអ៊ុន ដែលមិនផ្លាស់ប្តូរជំហរក្នុងការធ្វើការងារជាមួយសហរដ្ឋអាមេរិកដើម្បីលុបបំបាត់អាវុធនុយក្លេអ៊ែនៅឧបទ្វីបកូរ៉េ។
ការបង្ហាញសាររបស់លោក ដូណាល់ ត្រាំ នៅពេលនេះ គឺធ្វើឡើងតែប៉ុន្មានម៉ោងក្រោយពេល លោក គីម ជុងអ៊ុន បញ្ជាក់ជំហរប្តេជ្ញានៅចំពោះមុខបេសកជនពីកូរ៉េខាងត្បូងក្នុងការលុបអាវុធនុយក្លេអ៊ែ។ លោក គីម ជុងអ៊ុន និង លោ មូន ជែអ៊ីន មេដឹកនាំកូរ៉េខាងត្បូងក៏គ្រោងជួបគ្នាជាថ្មីទៀតនៅថ្ងៃទី១៨ដល់ថ្ងៃទី២០ខែកញ្ញា ខាងមុខនេះ។ នេះបើតាមសារព័ត៌មានChannel News Asia។
ទីភ្នាក់ងារព័ត៌មានរដ្ឋកូរ៉េខាងជើង KCNA ដកស្រង់សម្តីលោក គីម ចុះផ្សាយថា កូរ៉េទាំងពីរ ពិតជាអាចដោះស្រាយលុបបំបាត់អាវុធនុយក្លេអ៊ែបាន។
ទីប្រឹក្សាសន្តិសុខកូរ៉េខាងត្បូងលោក Chung Eui-yongដែលបានទៅជួបលោក គីម ថ្លែងថា មេដឹកនាំកូរ៉េខាងជើងគឺមិនបានផ្លាស់ប្តូរជំហរដែលព្រមព្រៀងជាមួយមេដឹកនាំអាមេរិកនោះទេ។ ទីប្រឹក្សាសន្តិសុខរូបនេះ បន្តថា លោក គីម ប្តេជ្ញាធ្វើការងារជាមួយលោក ដូណាល់ ត្រាំ ដើម្បីសម្រេចបំណងការលុបបំបាត់នុយក្លេអ៊ែ នៅក្នុងអាណត្តិរបស់លោកត្រាំ ដែលនឹងចប់នៅឆ្នាំ២០២១។
ការបញ្ជាក់ជំហរវិជ្ជមានក្នុងទំនាក់ទំនងជាមួយកូរ៉េខាងជើងពេលនេះ ក្រោយពេលលោក ត្រាំទទួលបានការបញ្ជាក់ជំហររបស់លោកគីម ក្នុងជំនួបជាមួយបេសកជនទីក្រុងសេអ៊ូល។ បើពិនិត្យកាលពីជាង១០ថ្ងៃមុន លោកត្រាំបានបង្ហាញជំហរអស់សង្ឃឹមម្តងរួចមកហើយ។
កាលពីថ្ងៃទី២៤ខែសីហា លោកត្រាំ បានចេញសេចក្តីថ្លែងការណ៍មួយលុបចោលគម្រោងរបសមន្ត្រីការទូតថ្នាក់កំពូលរបស់លោកគឺលោក Mike Pompeo ដែលគ្រោងបំពេញទស្សនកិច្ចនៅកូរ៉េខាងជើងជជែកពីបញ្ហាអាវុធនុយក្លេអ៊ែ និងការពិនិត្យលើការអនុវត្តន៍ខ្លឹមសារដែលមេដឹកនាំអាមេរិក និងមេដឹកនាំកូរ៉េខាងជើងបានព្រមព្រៀងគ្នាកាលពីខែមិថុនា នៅក្នុងប្រទេសសិង្ហបុរី។
ពេលនោះលោក ត្រាំ បញ្ជាក់ថា ដំណើរការលុបបំបាត់អាវុធនុយក្លេអ៊ែនេះ មិនមានការរីកចម្រើនទេ ហើយលោកក៏បានស្តីបន្ទោសចិនថា មិនបានជួយជ្រោមជ្រែងក្នុងការជំរុញដល់មេដឹកនាំកូរ៉េខាងជើងឲ្យគោរពតាមការព្រមព្រៀង។
ចាប់តាំងពីដើមឆ្នាំ២០១៨មក កូរ៉េខាងជើងបានបង្ហាញជំហរវិជ្ជមានក្នុងការលុបបំបាត់កម្មវិធីអាវុធនុយក្លេអ៊ែ។ លោក គីម ជុងអ៊ុន ក៏បានជួបជាមួយ មេដឹកនាំកូរ៉េខាងត្បូង មេដឹកនាំអាមេរិក ដើម្បីដោះស្រាយបញ្ហាប្រឈមគ្នា។ ប៉ុន្តែរហូតដល់ដើមខែកញ្ញា ឆ្នាំ២០១៨នេះ មិនទាន់មានលទ្ធផលជាផ្លែផ្កាណាមួយពីការរំលាយកម្មវិធីអាវុធនុយក្លេងអ៊ែនេះនៅឡើយទេ។