រដ្ឋមន្ត្រីក្រសួងការពារជាតិលោក ទៀ បាញ់ ថ្លែងបញ្ជាក់ថា ការតែងតាំង លោក ហ៊ុន ម៉ាណែត ជាមេបញ្ជាការកងទ័ពជើងគោក គឺផ្អែកលើសមត្ថភាពទាំងស្រុង មិនមែនធ្វើឡើងតាមរយៈខ្សែស្រឡាយនោះទេ។
កាលពីថ្ងៃសុក្រម្សិលមិញ មានការតែងតាំងមន្ត្រីជាន់ខ្ពស់ក្នុងជួរកងយោធពលខេមរភូមិន្ទ៣រូប ឲ្យកាន់តំណែងជា អគ្គមេបញ្ជាការ នាយសេនាធិការចម្រុះ និង មេបញ្ជាការកងទ័ពជើងគោក។ ក្នុងតំណោមតំណែងទាំងបី កូនប្រុសលោកនាយករដ្ឋមន្ត្រីហ៊ុន សែន គឺលោក ហ៊ុន ម៉ាណែត ត្រូវបានតែងតាំងជា មេបញ្ជាការកងទ័ពជើងគោក។
បន្ទាប់ពីពិធីតែងតាំងមុខតំណែងនោះ លោក ទៀ បាញ់ បានឆ្លើយសំនួរអ្នកព័ត៌មានដោយបញ្ជាក់ថា លោក ហ៊ុន ម៉ាណែត មានសមត្ថភាពគ្រប់គ្រាន់ក្នុងការកាន់តំណែងនេះ មិនមែនឡើងតាមខ្សែនោះទេ។
រដ្ឋមន្ត្រីក្រសួងការពារជាតិលោក ទៀ បាញ់
លោកហ៊ុន ម៉ាណែត មានតួនាទីជា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងអង្គភាពប្រឆាំងអំពើភេរវកម្ម។ កាលពីថ្ងៃទី៦ខែកញ្ញា កន្លងទៅនេះ ព្រះមហាក្សត្រ បានតែងតាំងលោក ហ៊ុន ម៉ាណែត តួនាទីមួយទៀតគឺ ជាមេបញ្ជាការកងទ័ពជើងគោក ជំនួស លោក មាស សុភា ដែលត្រូវតែងតាំងជា ទេសរដ្ឋមន្ត្រី ទទួលបន្ទុកបេសកកម្មពិសេស។