ប្រធានាធិបតីហ្វីលីពីន នៅថ្ងៃសៅរ៍នេះ បានចោទថា ប្រធានាធិបតីសហរដ្ឋអាមេរិកលោក ដូណល ត្រាំ ជាអ្នកធ្វើឲ្យមានវិបត្តិបណ្តាលឲ្យអតិផរណាសេដ្ឋកិច្ចហ្វីលីពីនឡើងខ្ពស់បំផុតមិនធ្លាប់មានក្នុងរយៈពេល៩ឆ្នាំកន្លងទៅនេះ។
តាមការវាយតម្លៃរបស់អ្នកជំនាញសេដ្ឋកិច្ចហ្វីលីពីនកាលពីខែសីហាបង្ហាញថា ប្រទេសនេះជួបអតិផរណា ៦,៤ ភាគរយ គឺជាអត្រាខ្ពស់បំផុតដែលមិនធ្លាប់មានរយៈពេល៩ឆ្នាំមកនេះ។ នេះបើតាមទីភ្នាក់ងារព័ត៌មានAFP។
លោក ឌូទើតេ ថ្លែងប្រាប់អ្នកសារព័ត៌មាននៅថ្ងៃនេះថា មូលហេតុធ្វើឲ្យប៉ះពាល់ដល់សេដ្ឋកិច្ចនេះគឺដោយសារតែ លោក ដូណល ត្រាំ ដំឡើងពន្ធនាំចូលអាមេរិក។ ប៉ុន្តែលោកបញ្ជាក់ថា លោកមិនបានខឹងសម្បារជាមួយលោក ត្រាំទេ គឺគ្រាន់តែយកបញ្ហានេះ ទៅជជែកគ្នារកដំណោះស្រាយ។
លោក ឌូទើតេ មិនបានបញ្ជាក់ថា តើការជជែកជាមួយលោកដូណល ត្រាំ ធ្វើឡើងដោយរបៀបណាគឹជួបផ្ទាល់ឬ តាមទូរសព្ទ ?ឬ ត្រូវជជែកនៅពេលណានោះទេ?។