មហាសេដ្ឋីចិន និងជាសហស្ថាបនិកក្រុមហ៊ុន អាលីបាបា បានប្រកាសថា លោក នឹងចូលនិវត្តន៍ដកខ្លួនចេញពីការធ្វើជំនួញនៅថ្ងៃទី១០ខែកញ្ញាសប្តាហ៍ក្រោយនេះ ហើយចំណាយពេលក្នុងជីវិតចុងក្រោយលើកិច្ចការសប្បុរសធម៌ផ្តោតលើវិស័យអប់រំ។
លោក Jack Ma បានថ្លែងបែបនេះ នៅក្នុងបទសម្ភាសន៍មួយជាមួយសារព័ត៌មាន New York Times ដោយបញ្ជាក់ថា នឹងចូលនិវត្តន៍នៅថ្ងៃចន្ទសប្តាហ៍ក្រោយ ជាថ្ងៃទី១០ខែកញ្ញា ត្រូវនឹងខួបអាយុ៥៤ឆ្នាំរបស់លោក។
មហាសេដ្ឋីជាអតីតគ្រូបង្រៀនភាសាអង់គ្លេសរូបនេះ បានបោះបង់អាជីពជាគ្រូបង្រៀន ហើយសហការជាមួយមិត្តភ័ក្តិផ្សេងទៀត បង្កើតក្រុមហ៊ុន អាលីបាបា ធ្វើជំនួញតាម អ៊ីនធើណែត កាលពីឆ្នាំ១៩៩៩។
លោក Jack Ma ជាមហាសេដ្ឋីទី៣នៅប្រទេសចិន និងជាមហាសេដ្ឋីទី២០នៅលើពិភពលោក នេះបើតាមទស្សនាវដ្តីForbes។ លោក ក៏ជាបុគ្គលលេចធ្លោក្នុងវេទិកានានាជំរុញលើកទឹកចិត្តមនុស្សដែលអស់សង្ឃឹម និងចែករំលែកពីបទពិសោធន៍នៃការធ្វើជំនួញ។
លោក Ma កើតថ្ងៃទី១០ ខែកញ្ញា ឆ្នាំ១៩៦៤ ក្នុងគ្រួសារក្រីក្រមួយ នៅក្នុងទីក្រុងHangzhou ខេត្ត Zhejiang ភាគខាងកើតនៃប្រទេសចិន។ កាលនោះគ្រួសារពឹងផ្អែកតែប្រាក់ចូលនិវត្តន៍ឪពុករបស់លោកមួយខែទទួលបាន៤០ដុល្លារប៉ុណ្ណោះ។
គិតត្រឹមថ្ងៃសុក្រម្សិលមិញ លោក Jack Ma មានទ្រព្យសម្បត្តិក្នុងទឹកប្រាក់សរុបចំនួន៣៨,៦ ប៊ីលានដុល្លារ ខណៈទ្រព្យសម្បត្តិរបស់ក្រុមហ៊ុនអាលីបាបាទាំងអស់មាន ចំនួន៤២០,៨ ប៊ីលានដុល្លារអាមេរិក។
