ព្រាប កុល ថាស្តាយលុយបង់ពន្ធបើយកទៅចំណាយលើប្រាក់ខែឧត្តមក្រុមប្រឹក្សាពិគ្រោះនិងផ្តល់យោបល់

នាយកអង្គការតម្លាភាពកម្ពុជា លោក ព្រាប កុល រិះគន់ឧត្តមក្រុមប្រឹក្សាពិគ្រោះនិង ផ្តល់យោបល់ដែលទើបតែត្រូវបានតែងតាំង ដោយថា លោកមិនចង់ចំណាយលុយបង់ពន្ធទៅលើប្រាក់ខែក្រុមការងារនេះទេ។

បង្ហោះនៅលើ Facebook របស់ខ្លួនកាលពីម្សិលមិញ លោក ព្រាប កុល បានសរសេរថា៖

លោកបន្តទៀតថា៖

លោក ព្រាប កុល បញ្ជាក់ដែរថា គិតសរុបមកដល់ពេលនេះ ​លោកបង់ពន្ធជូនរដ្ឋអស់ជាងដប់ម៉ឺនដុល្លារចេញពីកម្លាំងញើសឈាមរបស់លោក​ និងជាច្រើនម៉ឺនដុល្លារទៀត​តាមរយ:ការទិញសម្ភារ អាហារ និងផលិតផល​ប្រើប្រាស់។

នៅពេលសួរបន្ថែមថាហេតុអ្វីយល់ដូច្នេះ? លោក ព្រាប កុល ដាក់ចម្ងល់ត្រឡប់មកវិញថា តើស្ថាប័នទើបបង្កើតថ្មីនេះនឹងមានប្រយោជន៍សំខាន់ប៉ុនណាសម្រាប់សង្គមជាតិ? និងថារដ្ឋាភិបាលមិនខ្វះយន្តការទទួលគំនិតទេ ដូចជាស្ថាប័នជាតិ សង្គមស៊ីវិល អ្នកឯករាជ្យសម្រាប់ផ្តល់យោបល់ឆ្លុះបញ្ចាំងចំណុចខ្លាំងខ្សោយនៃគោលនយោបាយនិងការអនុវត្ត។ លោក ព្រាប កុល នៅដាក់ចម្ងល់ទៀតថា តើសមាជិកទាំង៣០នាក់ដែលមកធ្វើការនៅស្ថាប័នដ៏ខ្ពង់ខ្ពស់នេះ ជាឧត្តមបុគ្គលហើយឬនៅ?

ឆ្លើយតបនឹងមតិខាងលើ សមាជិកឧត្តមក្រុមប្រឹក្សាពិគ្រោះនិងផ្តល់យោបល់ និងជាប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុង មានប្រសាសន៍ថា នេះគឺជាការវាយតម្លៃស្ថានការមុនការងារបានអនុវត្តន៍។ លោកបន្តថា លោកបានចំណាយលុយពន្ធមិនក្រោមមួយលានដុល្លារទេទៅលើសង្គមខ្មែរព្រោះលោកជាអតីតពាណិជ្ជករ។

លោកបន្ថែមថា លោកនៅមិនទាន់កំណត់សកម្មភាពការងារដែលនឹងធ្វើនៅក្នុងឧត្តមក្រុមប្រឹក្សាពិគ្រោះនិងយោបល់នៅឡើយទេ ព្រោះនៅមិនទាន់ចូលធ្វើការនៅឡើយ ហើយថា សូមឲ្យប្រជាពលរដ្ឋចាំវាយតម្លៃនៅពេលក្រោយ។

បើតាម លោក ព្រាប កុល រដ្ឋាភិបាលនឹងត្រូវចំណាយថវិកាយ៉ាងតិចក៏​ប្រហែល​៤លានដុល្លាក្នុង១ឆ្នាំដែរ បើបូកទាំងថ្លៃឡាន​ ថ្លៃសាំងឡាន​ តៃកុង​ ជំនួយការ​ និងការចំណាយរដ្ឋបាលសម្រាប់លេខាធិការដ្ឋាននៃស្ថាប័ននេះ។

កាលពីថ្ងៃទី៦ ខែកញ្ញា ឆ្នាំ២០១៨ ព្រះមហាក្សត្រព្រះករុណាព្រះបាទសម្តេចព្រះនរោត្តម សីហមុនី បានចេញព្រះរាជក្រឹត្យត្រាស់បង្គាប់តែងតាំង និងផ្តល់ឋានៈជូនសមាសភាពឧត្តមក្រុមប្រឹក្សាពិគ្រោះនិងផ្តល់យោបល់ចំនួន៣០រូប ដែលមានឋានៈស្មើទេសរដ្ឋមន្រ្តី និងរដ្ឋមន្រ្តី។