ក្រសួងការពារជាតិបានសម្រេចផ្ទេរអង្គភាពទ័ពចំនួន៥ពីអគ្គបញ្ជាការទ័ពឲ្យមកស្ថិតក្រោមការគ្រប់គ្រងរបស់បញ្ជាការដ្ឋានកងទ័ពជើងគោកដែលគ្រប់គ្រងដោយកូនប្រុសលោកនាយករដ្ឋមន្ត្រីហ៊ុន សែន គឺឧត្តមសេនីយ៍ឯក ហ៊ុន ម៉ាណែត។
ក្នុងសេចក្តីប្រកាសចុះថ្ងៃទី៦ កញ្ញា ដែលចុះហត្ថលេខាដោយរដ្ឋមន្ត្រីការពារជាតិលោក ទៀ បាញ់ អង្គភាពទ័ពទាំង៥នោះរួមមាន កងពលធំអន្តរាគមន៍លេខ២ កងពលធំអន្តរាគមន៍លេខ៣ កងពលតូចអន្តរាគមន៍លេខ១ កងពលតូចទ័ពពិសេសឆ័ត្រយោងលេខ៩១១ និងកងពលតូចលេខ៧០។
ការផ្ទេរកងទ័ពចំនួន៥អង្គភាពឲ្យស្ថិតក្រោមការគ្រប់គ្រងរបស់បញ្ជាការដ្ឋានកងទ័ពជើងគោកនេះ គឺធ្វើឡើងតែ១ថ្ងៃប៉ុណ្ណោះមុនលោកហ៊ុន ម៉ាណែតត្រូវបានក្រសួងការពារជាតិតែងតាំងជាមេទ័ពជើងគោកជាផ្លូវការ។
លោក ហ៊ុន ម៉ាណែត បានកាន់តំណែងជាមេបញ្ជាការស្ដីទី នៃកងទ័ពជើងគោក បន្ទាប់ពីលោក មាស សុភា បានលាលែងពីតំណែងទៅឈរឈ្មោះជាតំណាងរាស្ត្រសម្រាប់ការបោះឆ្នោតសភា កាលពីចុងខែកក្កដាកន្លងមកនេះ៕
