លោក ស ថេត ត្រូវបានប្រកាសឲ្យចូលកាន់តំណែងជំនួសលោក ជួន សុវណ្ណ ជាផ្លូវការនារសៀលថ្ងៃនេះ នៅស្នងការដ្ឋាននគរបាលរាជធានីភ្នំពេញ ដោយមានការចូលរួមពីរដ្ឋលេខាធិការក្រសួងមហាផ្ទៃ និងអភិបាលនៃគណៈអភិបាលរាជធានីភ្នំពេញ។
នៅក្នុងពិធីប្រកាសផ្ទេរភារកិច្ច និងតែងតាំងមុខតំណែងស្នងការនគរបាលរាជធានីភ្នំពេញ លោក ស ថេត បានប្តេជ្ញាថាលោកគោរព និងអនុវត្តយ៉ាងស្មោះត្រង់បំផុតចំពោះជាតិ សាសនា ព្រះមហាក្សត្រ ចំពោះរដ្ឋធម្មនុញ្ញកម្មវិធីនយោបាយចតុកោណដំណាក់កាលទី៤ របស់រាជរដ្ឋាភិបាល។
លោកក៏បានសន្យាថានឹងប្រតិបត្តិយ៉ាងមឺុងម៉ាត់ និងដោយសច្ចធម៌ចំពោះមុខច្បាប់ និងបទបញ្ញាត្តិផ្សេងៗរបស់ថ្នាក់ដឹកនាំគ្រប់លំដាប់ថ្នាក់។ ក្រៅពីនេះលោកក៏បានប្ដេជ្ញាដែរថានឹងប្រើកម្លាំងកាយចិត្ត និងគំនិតប្រាជ្ញា ដើម្បីបម្រើសេវាសាធារណៈជូនប្រជាពលរដ្ឋ ក៏ដូចជារក្សាសាមគ្គីភាពផ្ទៃក្នុង និងអង្គភាពពាក់ព័ន្ធផ្សេងៗទៀតឲ្យបានល្អប្រសើរ។
លោក ស ថេត បានត្រូវបានតែងតាំងជាអគ្គស្នងការរងនគរបាលជាតិកាលពីខែកញ្ញាឆ្នាំមុន បន្ទាប់ពីលោកត្រូវបានផ្ទេរភារកិច្ចពីស្នងការនគរបាលខេត្តបាត់ដំបង៕